Page 41 - EXTRA 04 NOV,2015

Djarason 4 Novèmber 2015 41

UN PASO MAS
SERKA PA YEGA
NA UN KORTE
KONSTITUSHONAL

WILLEMSTAD.-
Evaluashon konstitushonal
a ser poné riba agènda di
Parlamento dor di frakshon
di partido PAIS. Esei EXTRA
por a komprondé di liderazgo
di e partido. T’asina ku for
di 2010 e partido aki ta boga
fuertemente pa bini ku un
sorto di prueba asina pa bini
ku un korte konstitushonal.
N’e momentunan aki
PAIS ta poniendo e último
toke na un inisiativa di
lei ku ta kontené kambio
di e Areglo di Estado di
Kòrsou i den kual e prueba
konstitushonal ta ser inkluí.

PAIS ta kere ku
mediante institushon di
un Korte Konstitushonal,
nos demokrasia lo ser
fortifiká. Ku un evaluashon
konstitushonal lo por
evitá ku un mayoria
pa koinsidensia den
Parlamento òf gobièrnu
por disidí unda e Areglo di
Estado ta pone obligashon
òf no, siendo ku esaki tei
presisamente pa protehá e
pueblo, tambe kontra deseo
di un mayoria.

Den e Areglo di Estado
tin e derechonan básiko di
e pueblo; ta derechonan ku
no por ser violá i ku no por
bira ko’i hunga a base di
interesnan di koalishon.

Ku e enkuentronan
tripartit ku parlamentonan
di Aruba, Kòrsou i St.
Maarten na Den Haag na
mei 2015, lantamentu di
un Korte Konstitushonal
ta yega mas serka, pa
motibu ku e paisnan aki a
indiká kaba di ta deseá un
evaluashon konstitushonal
komo instrumento di kontròl
den un estado di derecho
demokrátiko.

Loke ta partikular den
e proposishon aki di PAIS
ta ku e ta kontené un
rekonosementu dòbel dje
outoridat. Na promé lugá,
Korte lo por evaluá un lei
ku a keda akseptá pero no a
drenta na vigor ainda pa wak
si e ta den konkordansia ku
Areglo di Estado. Esaki ta e
evaluashon konstitushonal.
Na di dos lugá Korte lo
por duna su posishon den
disputa entre órganonan
estatal. Te na ora ku no tin
un disputa konkreto mes
ainda, lo por ta deseabel pa
un hues duna su opinion
di akuerdo ku e Areglo di
Estado ku ta e areglo legal
di mas haltu den e pais.