Page 27 - DESPA FLIP 17 JUNE 2017

Palabranan di Premier Eman tabata enfoca riba gratitud p’e trabao valioso cu
profesionalnan den cuido medico ta desempeña den comunidad, con e ta hancra den e
balornan di nos pueblo Arubiano manera dedicacion y amor pa prohimo.

“Un palabra di gratitud p’e trabou cu boso ta desplega tur dia,” Prome Minister a bisa.

Na opinion di Prome Minister salud t’e esencia di nos bida cu hopi bes nos ta tuma como
algo normal te na momento cu nos tin un kebrante di salud. Ni cuanto placa un persona
tin na momento cu e tin un kebrante di salud, e ta dispuesto pa duna tur cos p’e haya e
salud aki bek, “y esey ta bisa hopi di e trabou cu boso tur ta haci pa garantisa salud di nos
hendenan.”

Na momento cu tin un hende cu kebrante di salud den nos famia of un persona cerca, nos
tur ta sinti un inkietud, nos tur ta sinti un preocupacion. Esnan cu tin e capacidad pa yuda
mehora nos salud ta sinti e responsabilidad pa sanea y trece bek e salud di e persona aki
p’e por tin e calidad di bida cu nos kier pa nos prohimo.

Esaki t’e esencia di nos relacion manera nos Creador a pone nos riba e mundo aki, pa ta
servicial, pa ta den un convivencia continuamente un pa cu otro.

“E amor, e convivencia, e sentido di responsabilidad cu nos tin pa nos ruman, pa nos
famia, pa nos amistadnan nunca mag di cambia,” Prome Minister a comenta indicando
tambe cu e trayectoria di ultimo 100 aña ta un testimonio riba su mes, pero tambe un
compromiso pa su continuidad.

“Laga semper esaki ta un di e virtud y balornan di nos tur, uno pa cu otro. Salud
finalmente ta loke ta laga nos tur ta personanan alegre, contento den e capacidad pa haci e
maximo pa nos bida,” Minister President Eman a finalisa bisando.

http://awemainta.com/prome-minister-ta-felicita-tur-sector-di-cuido-medico-cu-nan-di-100-
aniversario-un-fuerte-aplauso-pa-cada-un-cu-ta-haci-un-diferencia-den-nos-salud/