Page 1 - AM201007

October 7, 2020
www.awemainta.com
www.facebook.com/awemainta
noticia@awemainta.com
583-1400

Un persona seriamente herida:
ACCIDENTE SERIO MOMENTO CU UN AUTO A

BOLTER Y RANCA PAL’I LUZ NA BLOEMOND

DIALUNA anochi pa mas o menos 7:30 Polis y Unidadnan
di Rescate di Brandweer a sali direccion Bloemond, unda
un accidente serio a sosode ora cu un auto a bolter.
Informacionnan adicional tabata bisa cu e vehiculo te
hasta lo a pega of tabata na candela. Esaki a pone cu tur
unidad di rescate entre nan Polis a pura pa yega e sitio.
Na yegada nan a topa cu un auto cu no tabata na candela y
un chauffeur riba tera benta, no ta conoci si su mes a sali
of a wordo saca dor di e auto.
E vehiculo cu a bolter lo tabata bayendo riba e caminda di
Bloemond cu velocidad super halto y esaki mes a causa cu
el a perde control y dal un otro auto. Wayanan di coriente
a keda colga na un manera masha peligroso mes y esaki a
haci cu autoridad tabata tene hendenan riba un distancia.

Na yegada di Unidadnan di Rescate manera Bomberonan,
nan no tabatin ningun candela pa paga manera a wordo
bisa. Por a mira bomberonan yudando e Paramediconan
prepara e victima pa despues pone den ambulance y sali
direccion Hospital. N’e sitio a presenta specialista di
trafico, BFTO y tambe slachtofferhulp. Departamento di
Trafico a conduci un investigacion bastante extenso cu a
termina den careda di 10’or pasa di anochi.

Mientrastanto Elmar si tabatin un trabou grandi pa lanta e
pal’i luz unda tabatin un transformer grandi ariba. Algun
parti den Paradera a keda sin coriente pa oranan largo.