Page 5 - MIN ON

Gabinete Mike Eman II ta percura pa
‘Dreamers’ bira un realidad na Aruba

- Advertisement -

ORANJESTAD (AAN): Loke pa hopi tabata representa un soño pa hopi tempo
inalcansabel awo Gobierno di Aruba ta duna oportunidad pa bira realidad. Ta calcula cu
rond di 400 mucha, hoben y hoben adulto na Aruba ta cay den un limbo legal cu ta
stroba nan di tin yega na un status legal di residencia.

Durante un conferencia di prensa diamars atardi Prome Minister Mike Eman hunto cu
Minister Sevinger di Maneho di Stranheria y director di DIMAS, Señora Kathy Ruiz-
Paskel a anuncia cu for di 1 di mei ta drenta na vigor e proyecto ‘Dreamers’.

E proyecto aki ta habri caminda pa esnan cu tin un minimo di 10 aña continuo bibando
na Aruba, di cual 5 aña ta studiante na un instituto educativo local y cu tin un carta di
Buena Conducta, pa inicia e tramitenan pa yega na un permiso tipo ‘Firma Liber’. Di e
manera aki e personanan aki por formalisa nan residencia riba nos isla, sea door di
traha of continua cu nan estudio den exterior, entre otro. E proyecto ‘Dreamers’ ta basa
riba e ‘DREAM Act’ (Development, Relief and Education for Alien Minors) cu Merca a
firma back na 2001 cu Gabinete Mike Eman a mira tambe ta necesario na Aruba ya cu
na numeroso occasion ta topa cu e tipo di casonan aki den nos comunidad.

DIMAS ta preparando dos anochi di informacion cu ta tuma luga riba 5 y 12 di mei
proximo y hunto cune, tur diabierna pa un termino di dos luna, e Departamento di
Integracion, Maneho y Admision di Strahero lo tin un loket special disponibel pa duna
informacion, ricibi formulario di peticion y atende cu tipo di casonan aki. Pa mas
informacion por bishita e webpage www.dimasaruba.aw y pa e conferencia di prensa
den su totalidad por bishita pagina di Facebook di Mike Eman.