Page 14 - AWEM 30-Apr-2015

14 AWEMainta Diahuebs, 30 April 2015

Picton Castle:

Velero clasico
cu un tinte
Arubano

E LO ta un bista special ora cu e velero Picton Castle cu

velanan bol aparece dilanti costa di Aruba. E nave aki lo ta
di bishita n’e isla den cuadro di Sail Aruba 2015. Capitan di
Picton Castle ta Daniel Moreland, naci na Aruba. Picton Castle
a wordo construi na 1928 como un trawler motorisa pa pesca.
E mesun compania a laga construi 4 mas y pa hopi aña nan a
wordo uza pa pesca den e lamanan rond di nan base na Wales.
E barconan tabata wordo considera, p’e tempo ey, barconan
moderno, cu aparatonan di iluminacion di coriente y aparato
pa midi profundidad.
Picton Castle a wordo yama asina na honor di un Kasteel na
Wales cu ta data di siglo 11.
Na inicio di Segunda Guera Mundial, Picton Castle a wordo
uza dor di Marina Britanico y tabata sirbi pa deshaci di
bomnan. E nave a sobrebibi guera, aunke di suerte. Un dia un
bom a explota net dilanti di e barco, cu a wordo lanta dor di e
olanan a causa di e impacto di e explosion. Sorpresivamente,
el a sufri masha poco daño y Picton Castle por a sigui normal
cu su trabou.

Riba e dia cu e Alemannan a dicidi di renuncia Noruega,
Picton Castle a drenta haf di Bergen, debi na un problema
tecnico serio. For di e tempo ey, e nave tabata conoci serca e
pueblo Noruego como e “Libertador di Noruegonan”.Despues
di guera, Picton Castle a wordo uza como barco di carga y pa
decadanan largo a transporta tur tipo di mercancia entre e
paisnan rond di Noordzee y estadonanan Baltico. E tempo ey
el a carga e nomber di Dolmar.
Na 1992 Capitan Moreland a bin den bista. E tabata en busca
di un barco cu por wordo reconstrui den un velero clasico.
Den fjorden di Noruega el a bin topa cu DOLMAR y a cumpre.
Hunto cu un tripulacion chikito el a prepara e barco p’e biahe
den Lama Atlantico y a yega New York. Eynan e barco, cu a
haya e nomber bek di Picton Castle, a haya un lugar na haf di
South Street Seaport Museum. Na 1996 Picton Castle a bay
di biahe pa Lunenburg na Nova Scotia, Canada, unda cu el
a pasa den trabounan di reconstruccion cu a costa 2 miyon
dolar p’e bira un”driemaster”.

Picton Castle ta un velero di 179 pia largo, ta pisa 300 ton, y
tin 12.500 m2 di bela. Ora cu e tripulantenan ta trahando den
e mastnan, tin biaha nan ta colga na un altura di mas cu dies
piso halto riba e dek. Nan ta logra separa mas di 175 linea
for di otro, hasta den scuridad. E nave ta wordo uza como un
barco di training, unda cu e hendenan por siña e detayenan
mas chikito di veleronan clasico.
Na 1998 Picton Castle tabata e “flagship” p’e Aña di Oceano
di UNESCO y a biaha rond mundo. Den Oceano Pacifico
el a reparti material di scol. Despues a realisa mas biahe cu
metanan humanitario y di durabilidad. “Durabilidad di mes
bo ta siña abordo di nos barco,” segun Capitan Moreland den
un entrevista cu e revista ExeQ. “Esnan cu ta nabega cu nos,
no solamente ta siña encuanto nave, pero tambe e disciplina
propio y realidad di ser humano. E luho mas grandi abordo t;e
naturalesa rond di nos. E aprecio p’esaki nunca bo ta perde.”
Moreland tin mas cu trinta aña di experencia riba veleronan
grandi y ta un di e autoridadnan mas respeta riba tereno di
veleronan tradicional riba lama.