Page 17 - download

AWEMainta.com DIASABRA 15 JANUARI 2022| 17

UN SNECHI DI PALABRA DI DIOS

II DIADOMINGO DEN AÑA 16.01.22 #346

I lectura: Is 62, 1-5

Salmo 96

II lectura: 1Cor 12, 4-11

Evangelio: Hn 2, 1-11

E di tres dia tabatin un casamento na Cana di Galilea. Hesus su mama tabata na e casamento. Nan a combida Hesus tambe
hunto cu su discipelnan. Ora cu biña a caba, Hesus su mama a bis’E: “E hendenan no tin mas biña!” Hesus a contest’e:
“Señora, kico bo kier pa Mi haci? Mi ora no a yega ainda.” Hesus su mama a bisa e sirbidonan: “Haci loke E bisa boso.”
T’asina cu e Hudiunan tin nan custumbernan religioso di purificacion; pa e motibo ey tabatin seis tinashi. Cada tinashi por
tuma ochenta pa shen liter di awa. Hesus a bisa e sirbidonan: “Yena e tinashinan ey cu awa.” Y e sirbidonan a yena nan te
na rand. E ora ey El a bisa nan: “Saca poco awa y hiba pa e maestro di ceremonia.”

Y nan a hiba e awa pa e homber. Ora e maestro di ceremonia a purba e awa cu a cambia bira biña, el a manda yama e
bruidegom. E no tabata sa di unda e biña a sali, ma naturalmente e sirbidonan cu a saca e awa, si tabata sa. El a bisa e
bruidegom: “Tur hende ta parti e miho biña prome y despues ora e hendenan a bebe basta caba, nan ta parti e biña di menos
calidad. Ma abo a warda e miho biña te awo!” Asina Hesus a haci su prome señal milagroso: ey na Cana di Galilea El a
mustra su gloria y su discipelnan a kere den dj’E.

Palabra di Señor.

MENSAHE

Awe, Iglesia ta invita nos pa medita e prome milager di Hesus.
Ta trata di transformacion di awa den biña durante di un casamento na Cana di Galilea.
Esnan cu a keda invita pa e casamento ta: Maria, Hesus y su discipelnan. Nos no sa nada di e pareha
cu a casa y otro invitadonan, pero por supone cu nan tabatin algun parentesco of familiaridad cu
Maria y Hesus. Den relato di evangelio aki Maria ta keda menciona como esun prome y e tin cierto
protagonismo den e historia aki. Hesus ta bin pa e casamento como un persona poco conoci, pero E ta sali como persona
central di e evento.
Maria ta esun prome cu ta ripara cu e pareha tin problema, pasobra biña a caba. E no ta lanta un alarma cu e pareha of
su famia, sino e ta acerca Hesus. Y aunke Hesus ta bis’e cu su ora no a yega ainda Maria ta sigur cu Hesus lo soluciona e
problema aki. P’esey e no ta papia mas cu Hesus, sino e ta dirigi su mes na e sirbidonan: “Haci loke E bisa boso.”
Despues cu Hesus a manda yena e tinashinan cu awa nan ta hib’e pa e maestro di ceremonia. E sirbidonan aki ta e prome
grupo cu ta kere den Hesus. Nan tabata consciente cu nan a yena e tinashinan cu awa y nan ta kere cu Hesus lo no haci
burla di nan y tur presente.
Tin biaha nos ta kere cu cierto cosnan no tin solucion. Nos ta kere cu loke Dios ta pidi no tin logica, pero pa Dios tur cos ta
posibel.
Mara cada un di nos por tin un deseo permanente di haci loke Hesus ta bisa nos, aunke su proposicionnan ta incomprendibel
y sin logica humano.
Laga nos aprecia tambe tur intercesion y intervencion di Maria cu semper ta guia nos na un encuentro cu Hesus cu por
cambia nos bida di problemanan den goso y fiesta.

ORACION

Señor, bendiciona tur matrimonio. Yena nan cu Bo amor.

PROPOSITO

Yuda otro ora nan ta den momentonan di problema y tristesa.