Page 46 - AWEMAINTA

46 AWEMainta Diabierna, 20 April 2018

Internacional

Por lo menos 120.000 persona a protesta

na Francia contra Emmanuel Macron

GRITANDO frasenan manera “Macron, Presidente die riconan” of
“Macron, arogante” casi 120 mil persona a sali diahuebs riba cayanan
di Francia den di 130 movilisacion convoca pa e sindicatonan CGT y
Solidaires pa protesta contra e Presidente Emmanuel Macron.
Na Paris a participa cerca di 15.300 persona, segun un recuento di e
Gabinete Occurrence, y unda e Secretario General di CGT, Philippe
Martinez, a reclama e Gobierno di Macron cu “stop di tuma nos manera
imbecil y p’e bisa nos kiko e kier”.

Durante e marchanan na e capital tabatin enfrentamentonan entre e
participantenan y polis, kendenan a tira gas lacrimogeno ora cu nan a
ricibi un lansamento di proyectil.
Ciudadnan manera Marsella, Lyon y Rennes, cu a uni na e protestanan
aki, a conta cu mas di 4.000 manifestante, segun Occurrence.
Tambe, un 22.7 % di e trahadornan di e compania Frances Sociedad
Nacional di Trein Frances (SNCF pa su inicialnan na Frances), a blokia e
trafico na Lille y a uni na e welga contra e reforma di e sector, cual ta pone
final na e garantia di empleo na contractnan nobo.

E mobilisacion a afecta e sector di energia, transporte publico, sector di
audiovisual publico y algun centronan educativo, unda tambe a manifesta
contra e reforma educativo cu, segun nan, e Ehecutivo lo establece un
“selección pa drenta universidad”.