Page 16 - AWEMAINTA

16 AWEMainta Dialuna, 7 Augustus 2017

Team Mervin a prepara su mes bon pa entregamento di lista

Ambiente grandi den Savaneta pa entrega di lista di AVP

FOR di tempran caba a nota masha movecion den becindario di
Cas di Partido AVP na Savaneta, unda por a busca sticker, bandera,
T-shirt y otro material di propaganda en conexion cu entrega di
lista diabierna merdia.
Den un caravana grandi di auto, hunto cu demas coleganan di pariba
di brug, drs. Mervin Wyatt-Ras, actual Presidente di Parlamento,
a sali pa veld di cricket pa ey topa cu lider di partido, mr. Mike
Eman, pa hunto cu demas coleganan entrega e lista victorioso na
Conseho Electoral.

Mervin Wyatt-Ras ta gradici tur su simpatisadornan cu a plak
sticker, pone banderin, a bisti T-shirt pa hunto cu nan candidata
preferi, entrega e lista cu lo mester hiba e partido politico na su di
tres termino di gobernacion.
E parada di AVP pa entrega di lista tabata masha grandi y a logra
comberti cayanan di Oranjestad den e color berde.

Drs. Mervin Wyatt-Ras a participa pa prome biaha den eleccion na
aña 2001 y a ricibi 735 voto, sigui pa eleccion di aña 2005 unda el
a logra 529 voto y na aña 2009 cu 703 voto.
Den su carera den partido MEP, el a ocupa e puesto di Parlamentario
y Presidente di Parlamento. Den eleccion di aña 2013, despues di
a bandona MEP, drs. Mervin Wyatt-Ras a subi lista di AVP como
candidata na # 7 y a logra 834 voto, mas cu nunca!

Despues di a sirbi na dos ocasion como Presidente di Parlamento,
acumulando asina hopi experencia y conocemento politico, den e
siguiente eleccion Mervin Wyatt ta aspira mas voto ainda pa por
sigui crece y pa por sigui sirbi nos comunidad den forma responsabel,
integro, serio y semper trahando pa derecho di nos hende muhernan.