Page 118 - MIN VOS

Maurits Malmberg: Bushiri: di un ruina pa un area publico
pa hoben y grandi

Tuesday, 11 July 2017 18:33
1

Comparti

Ex Bushiri y Bushiri hotel vakschool ta un lugar cu ta trece hopi nostalgia y recuerdo pa hopi hende na
Aruba en especial ex stududiantenan cu awe ta profesionalnan den diferente ramo den nos país.

Pa hopi aña caba e edificio aki ta para bashi y ta bai atrás te cu e la bira un ruina, un lugar caminda adicto
ambulantenan ta tuma refugio y cu ta forma un bista mahos no salamente pa localnan pero
especialmente pa turistanan cu ta bishita nos isla. Den consesho di minister algún luna pasa a tuma e
decisión cu lo basha e edificio di ex – Bushiri Hotel abow pa crea un espacio publico pa pueblo di Aruba.
Ultimo añanan e desaroyo turístico a crese y esaki a trece cune cu hopi espacio publico pa pueblo a bai
perdi y of a bira limita. E intención di Gobierno ta pa duna pueblo bek loke tanto pueblo ta anhela, esta
un espacio pa recrea y relaha manera e tabata antes riba nos dushi isla. Bushiri lo wordo desmantela y
conberti den un playa publico y un area cu por practica eventonan social y deportivo. Despues di e
anuncio aki Minister President a forma un grupo cual orguyosamente mi persona ta forma parti di dje, cu
lo tin cu inventarisa y evalua kico ta e potencial di e area grandiaki. Banda di esaki tambe mester papia cu
differente gremio pa sa kico ta e deseonan di pueblo pa cu esaki.

Aruba tin hopi deporte cu ta popular bow di e hobennan y aki por crea espacionan pa por ehempel futbol,
beach soccer/ tennis. Pero tambe banda di esaki tin hende cu kier un plaza cu ta bende cumindanan local
pero tambe facilidad di recreo pa nos muchanan. Nos no ta biba solamente pa traha, pueblo tin e drecho
manera cualquier otro hende pa por tin e libertad pa disfruta di nos dushi isla. Nos comunidad a cambia
hopi e ultimo añanan. Mi ta mira cu pa hobennan cu a falta di diciplina y respet, espacionan di recreo ta
sumamente necesario den nos comunidad. Hobennan mayoría di biaha no tin niun tipo di recreo y esaki
ta causa cu e hobenan ta caba den un atmosfera negativo na lugar di haci cosnan positivo. Mi ta kere
firmemente cu ,Si nos kier trece cambio nos tin cu pone nos mes den zapato di e hobenan, identifica nos
mes cu nan problemanan,sentimento y nan opinión. Pesey mi ta convenci cu e decisión pa crea mas
espacio publico ta un decisión correcto y estupendo. Ban motiva y trata nos hendenan manera mester ta.
Mas nos hisa e nivel di nos pueblo mas productivo nos comunidad lo ta. Mi ta invita boso pa comparti
boso ideanan cumi riba mi Facebook personal pa asina nos contribui na e bunita proyecto aki.