Page 31 - Min.ecem

Minister encarga cu medio ambiente y energia, Mike de Meza a confirma un biaha mas cu e parke di
mulina na Urirama lo wordo realisa. Den un entrevista diaranzon el a subraya cu “e parke ta bay bini”. El
a agrega cu esaki ta e direccion pa bay, esta den inversionnan pa cu energia renobabel, cu no ta solamente
miho pa medio ambiente, pero mas barata tambe.

E minister a bisa cu e resultado di e caso den corte tabata cu e huez a bisa cu e keho di e 11
persona/instancianan contra otorgamento di e “hindervergunning” tabata “niet ontvankelijk”, o sea cu sea
nan ta na e corte robez of simplemente e no ta trata e caso.

Unda cu e proyecto ta pega awo ta cu huez a bisa den su sentencia cu si Windpark Urirama kier instala e
mulinanan di 3.3 megawatt enbez di mulinanan di 3 megawatt e compania aki mester cuminsa e proceso
di peticion di nobo. Esaki tabata sentencia riba e punto unda cu Windpark Urirama a pidi huez pa cambia
e capacidad di 3 pa 3.3 megawatt den e permiso otorga.

Echo ta keda cu WEB tin un contract firma cu Windpark Urirama pa compra di energia cu ta wordo
genera pa e mulinanan. E mandatario a splica cu originalmente lo tabatin 10 mulina di 3 megawatt y e
compania a dicidi di pone 2 mulina menos despues di protestanan cu e mulinan lo ta stroba e bista y
ambiente rond di Kapel di Alto Vista.

Loke cu ta pasando awo ta cu compania cu ta fabrica e mulinanan y a no ta traha mulina di 3 megawatt
mas, pero ta ofreciendo esunnan di 3.3 megawatt. Segun De Meza esakinan lo compensa pa e potencial
perdi ora a dicidi di pone dos mulina menos. Ademas, e mandatario a splica cu e tecnologia ta desaroya
hopi lihe y e mulinanan di 3.3 cu ta wordo ofreci ta mas eficiente y efectivo, y nan tin un produccion mas
halto.

De Meza a bisa enfaticamente cu e huez no a bisa cu e proyecto no por sigui, pues si tabatin mulina di 3
megawatt disponibel, Windpark Urirama lo por a cuminsa cu instalacion.

Gobierno ta kere den e maneho berde, esta di energia renobabel, cual ta sumamente importante y futuro
lo demostra esaki tambe, De Meza a bisa.

El a splica cu te awo, tanten cu tecnologia solar ta bayendo den bon caminda, en realidad tecnologia pa
genera coriente for di biento ta keda esun mas barata. El a haci e comparacion cu pa produci coriente ta
costa US$0.22 per kWh uzando tecnologia tradicional, cu e tecnologia Recip, esaki a bira US$ 0.16 per
kWh y biento ta costa entre US$ 0.08 pa US$ 0.09 per kWh y e ta miho pa medio ambiente.

WEB tin un prijs hasta mas abao pa cumpra coriente for di Urirama, ora cu esaki wordo realisa, si
compara cu e prijs cu ta pagando awo na Vader Piet.

De Meza a bisa cu tin tur indicacion cu prijs di crudo y consecuentemente e prijs di fuel oil ta bay subi bek
drasticamente, pero poniendo y teniendo tecnologia pa energia renobabel den funcion Aruba lo tin hopi
beneficio.

Comentarionan (1)