Page 8 - FUNDASHON LOTTO PA DEPORTE

30 AWEMainta Dialuna, 7 Mei 2018

Deporte

Dakota ta gana e ‘campeonato regular’ di Division Honor derotando RCA 2-0

E tricolornan ta keda elimina

E ‘DERBI di Aruba’ entre Dakota vs RCA tabatin hopi implicacion riba
e tabla di clasificacion final di e campeonato di Division Honor e aña aki.
Dakota cu un victoria lo gana e campeonato regular di Division . Honor,
RCA cu un victoria lo a keda cu un chens pa bay Play-Off como e di cuarto
ekipo, si Britannia lo a perde cu Bubali, simpel, victoria so tabata e tema
principal den e wega aki.

E contraste di e dos ekiponan aki no por ta mas duidelijk; Dakota, un ekipo
hoben, cu un velocidad impactante, cu ta usa e velocidad ey pa fomenta nan
ofensiva potente. RCA ta un ekipo experimenta, di forsa fisico y defensa
solido cu mester controla medio-campo pa lansa nan ofensiva. E wega di
Dakota ta pa “blitz” cu pressing halto tin biaha, RCA ta depende di kibra
wega di e rival, den un ‘build-up’ gradual cu pasenshi.

E wega den e prome 10 minuutnan tabata un di calma pero semper cu un
tension grandi, unda e ekiponan tabata mas bien studiando otro pa wak ki
movemento haci promer, un wega di postura y tactica. Poco poco por wak
con Dakota ta haci nan prome ‘move’, lansando atake di velocidad riba e
dos halanan, evitando e wega for di medio campo unda RCA tin mas chens
di controla e wega tras di e forsa di nan experiencia, e volantenan Jean Luc
Bergen y Jeamir Howell-Brokken y compania. Dakota su strategia tabata
semper pa uza nan atacantenan di velocidad mane Ricky Hodge, Sherman
Monticeuex y compania sin mester di bataya pa e middenveld ey. Dakota
tabata dispuesto pa no bay den un toma y dame fisico cu RCA, pa controla
e wega di posesion, cu ta exactamente loke e ekipo di Solito lo tabata kier.
RCA tambe lo tabata kier a test e disciplina di Dakota, sacando nan for di
nan plan y ritmo di wega, un area unda Dakota sa ta vulnerabel, e wega
mental ey.

Despues di e promer 10 minuutnan unda e wega a cuminsa haya forma, RCA
tambe ta lansa atakenan, hopi biaha den estilo di contra-golpi ora cu Dakota
bay all out den nan atake y perde e bala cu e defensa solido di RCA unda e
bala ta bay di biaha pa nan medio campistanan pa distribucion. Apesar di
algun yegada y iniciativa tempran di e ekipo di Solito, toch por a sinti cu e
wega di RCA no tabata ‘click’ ainda, kizas cu presion pa sali bay busca gol di
biaha pa e victoria tan necesario den un wega pa nan bida, tabatin un ‘ansha’
y net nan cu mester di pasenshi pa hunga nan wega. Dakota tambe cu nan
velocidad y toke tabata tene e bala for di RCA, factor determinante tambe.

Prome cu e punto di mei ora di wega, na minuut 25 RCA tabatin chens
grandi pa anota pero a bay perdi despues di un “double save” di defensa
y portero Dakotero Lionel Kaarsbaan, esey a sinti tambe mane cu RCA a
perde nan gran chens di e wega, ta manera nan a perde nan aire eynan,
que tal si nan a score? Dakota cu ya tabata hayando mas resultado cu nan
“high-pressing”, cu bastante bon yegadanan, a sigui ta consistente, e trabou
calcula ey a resulta den e gol di Dakota, pa medio di Sherman Monticeuex
na minuut 26 den un atake relampago despues cu RCA a perde e bala den
un pressing halto di e delanteronan Dakotero, Dakota ariba 1-0, RCA awo
tabata sinti mane ta un montanja tin pa subi apesar cu ta un diferencia
minimo so. RCA tabatin mas chens despues pero no di calidad, y esey ta ora
nan haya e bala, cu tabata menos cada biaha.