Page 22 - AWEM 04-Mei-2015

22 AWEMainta Dialuna, 04 Mei 2015

Por sinti cu Rey
ta contento di
ta na Aruba y

riba waf

DIRECTOR di APA N.V. Jossy Figaroa tabata e anfitrion di e

Pareha Real na momento cu nan a subi tereno di waf. El a ricibi
Rey Willem Alexander y Reina Maxima y a guia nan n’e prome
parti di e evento cu tabata e apertura di Sail Aruba 2015.
Despues di esaki e Pareha Real a bay pa inicio di e competencia di
bela y a regresa n’e terminal y a bishita e exposicion cu tin.
Ta trata di historia di nos waf y e lo ta habri pa publico por disfruta
di dje den e dianan aki, segun sr. Jossy Figaroa a duna di conoce.

Director di APA a indica cu ta un honor grandi pa nan por tin
Rey riba waf y cu e parti bunita ta cu por a sinti for di dje cu e ta
contento di ta na Aruba, contento di ta riba waf. Ta conoci cu nos
Rey gusta awa y ora e tabata wak e diferente barconan pasa, por
a wak den dje cu e tabata goza y con bunita e tabata haye.
Ta trata di un evento historico, pa prome biaha nos waf tabatin
un evento asina grandi cu hopi preparacion, hopi hende envolvi y
Jossy Figaroa a gradici tur cu a traha pa por tin algo asina bunita
den otro.

Reaccion di e diferente invitadonan pa loke t’e evento tabata
hopi positivo, nan a bisa sr. Figaroa cu nan ta contento, cu ta
impresionante con e waf ta mustra, cu e ta bon prepara y cu nan ta
cana trankilo riba nos waf. “Mi ta wak tur ta hari, tur ta contento
y esey ta bon pa Aruba. Nos mester keda presenta Aruba como
producto pa turismo, pero ora hendenan wak cu nan por cana
riba nos waf y cana trankilo, pa nos e ta un señal cu ta bon y t’e
caminda cu nos tin gana di bay”. Jossy Figaroa tambe a expresa
cu Rey Willem Alexander ta hopi bon na altura di e desaroyonan
cu ta bay tuma lugar na nos wafnan y a bisa Director di APA cu e
kier tende mas for di dje riba e plannan aki.