Page 17 - AWEM 23-Mrt-2015
P. 17
AWEMainta Dialuna, 23 Maart 2015 17
Team Aruba ta
sinti nan mes
na cas cu IHRA
DESPUES di un temporada largo di ‘off season’, Team Aruba
tabata ancioso pa subi pista bek y tackle e competencia riba 1/4
miya di IHRA Nitro Jam pista. E careda a tuma lugar na Port
Allen, Louisiana y tabata yama e IHRA Mardi Gras Nationals.
‘Tabata great pa personalmente topa cu tur e miembronan nobo
di IHRA como tambe nan staff,’ Trevor Eman, manehador di
Team Aruba su Mustang. ‘Nan a laga nos sinti na cas di biaha.
E careda mes tabata uno fantastico y tabata great pa ta bek cu
IHRA.’
Team Aruba a califica p’e categoria di Mountain Motor Pro Stock
cu un tempo di 6.39 na un velocidad di 222 miya pa ora. Den
e prome rond a toca turno pa Team Aruba pusta contra John
Montecalvo, kende t’e campeon mundial di IHRA di aña 2009.
Despues di un careda duro, Team Aruba a logra gana Montecalvo
cu un tempo di 6.326.
Jobida di e dia anterior a haci cu e pista a bira un poco debil mas
parti di anochi y cu a haci cu den e di dos rond, Team Aruba a
experencia un ’tire shake’. Esaki a resulta cu e competencia JR
Carr a tuma e victoria den e semi final.
Por bisa cu New Orleans tin un cultura un poco diferente cu e
resto di Merca. Como cu Team Aruba tambe ta di un otro pais,
pues cu un otro cultura, nan a logra di haci un coneccion cu e
hendenan local.
Nan por a asocia nan mes cu e habitantenan di New Orleans y a
aprecia nan cultura y forma di biba.
Team Aruba a set up nan trailer na un forma strategico, decora
cu e logo oficial di Aruba, y a duna hopi informacion di nos dushi
isla.
E siguiente careda lo tuma lugar di 17 pa 19 di april na
Brandenton Motorsport Park. Como cu e careda aki ta uno hopi
facil pa fanaticonan di Aruba bin presencia,
Team Aruba kier invita tur nan fanatico na Aruba pa yega
Bradenton, Florida riba e fecha nan menciona p’asina apoya
Team Aruba n’e siguiente careda.
Trevor Eman ta sigui bisa: ‘Nos tin un tremendo auto di careda,
cu un motor cu ta produci hopi forza y mas cu tur cos, un ekipo
cu ta traha hopi bon cu otro.
E combinacion aki hunto cu un ekipo profesional y amical den
IHRA lo sigura un tremendo temporada di careda.’ 
