Page 12 - DIGICEL

Minister Arends E evento ta bay ta uno yena cu informacion
util

Wednesday, 05 July 2017 19:40
1

Comparti

Minister Arends hunto cu partnernan strategico di Ministerio di Asuntonan Economico a tene un
conferencia di prensa pa anuncia e 'Small Business Event'
cu ta tuma lugar diasabra 8 di juli na Renaissance Convention Center for di 9'or di mainta pa 1'or di
atardi. "Meta di e evento aki ta pa presenta e 4 top sectornan cu ta representa e desaroyo economico nobo
cu lo wordo desaroyo den e 5 areanan fisico di oportunidadnan economico cu nos a bin ta presenta
ultimo tempo ", asina Arends a splica den su introduccion.
Minister di Asuntonan Economico a indica cu e evento ta uno cortico, pero yena cu informacion util. "E
ta consisti di un parti cu lo mester sirbi di inspiracion unda representantenan di cada un di e 4 top
sectornan ta trece dilanti nan experiencia y relato. E prome ta 'Gianni's Group' cu ta consisti di un famia
cu a revoluciona e industria hospitalario aki na Aruba y con a base di nan conocimento nan a expande
esaki mucho mas cu solamente Horeca. Nan lo splica kico ta e ingredientenan necesario pa por tin un
negoshi exitoso."

Un otro top sector ta tecnologia limpi. Esaki ta wordo representa pa ACE Engineering. "Esaki ta un
compania di ingenieronan local cu a haci uso di e oportunidadnan cu tin den e area di tecnologianan
limpi. Nan lo tey pa presenta nan negoshi, pero tambe inspira esnan presente cu nan experiencia y
conocimento." Un otro topsector pa loke ta trata maneho economico ta e industria di logistica. Interport
Logistics lo amplia kico tur logistica ta encera aki na Aruba. Waf di Barcadera y e area rond di dje ta un
fuente masha grandi di oportunidadnan pa loke ta trata logistica. Cu e evento aki nos kier inspira futuro
empresarionan pa nan wak kico ta e posibilidadnan pa loke ta inversion y haci negoshi den e area aki y
tambe e empresa lo duna su bista riba e sector aki", Minister Arends a splica.

E siguiente top sector ta di industria creativo y ta wordo representa pa SETAR NV, e compania nacional
di Telecomunicacion. SETAR NV ta un compania cu ta invertiendo masha hopi mes den loke ta
datacenter. Por ta no ta mucho conoci cu aparte di telefon, internet y cellulair SETAR NV ta presta
servicio di un 'real estate di datacenter'. "Na unda tin proteccion y supervision un comerciante por tin su
datacenter instala den un edificio di SETAR NV. Esaki ta un mercado nobo di SETAR NV y ta algo cu sin
duda mester haya atencion", Arends a bisa. "Exportacion di conocimento ta un otro top sector cu nos a
logra haya den e sector turistico. En corto esaki ta e 4 top sectornan cu ta wordo presenta durante e
Small Business Event diasabra awor. Esaki ta e prome parti di e conferencia cu ta consisti di dos seccion.
Den e siguiente parti den gruponan limita lo amplia riba diferente otro topico cu ta aplicabel den practica
ora di haci negoshi.