Page 9 - MIN ON

DRS. SHAILINY (SHAY) TROMP-LEE (MEP):

PRIORIDADNAN ROBES! UN KEHO CU TUR

CAMINDA TA RESONA

July 28, 2017 Admin Uncategorized Leave a comment

Canando den pueblo mayoria caminda mi ta tende e mesun cos: gobierno tin
prioridadnan robes. Na 2013 esaki caba tabata e caso pero e kehonan tabata
menos. Pero awe 4 aña despues mester constata cu e inversionnan realisa pa
Gobierno no ta creando e cuponan di trabou duradero asina necesario, no ta
soluciona problemanan existente of no ta crea e alivio cu tanto nos famianan ta
anhela. Pa colmo e inversionnan no ta produci extra placa pa caha di gobierno
tampoco. Den hopi hogar aki na Aruba tin un tata/mama di famia cu ta busca un
trabou fiho of tin yiunan cu a caba scol (EPB of EPI) cu no ta logra haya un
trabou.

Pobresa alarmante

E sentimento real ta di desesperacion. Placa no ta yega mas y debenan si ta
aumenta. Despues di paga nan debenan, no ta resta suficiente placa pa biba un
bida digno. E pobresa na Aruba ta alarmante y esaki no ta nos como politico so
cu ta cana cas pa cas ta experiencia esaki pero instancianan manera Rode Kruis
y fundacionnan cu ta yuda riba e tereno aki tambe a constata cu tin pobresa na
Aruba. Mester pone e hende bek central. Famianan mester tin e posibilidad pa
progresa! Pueblo mester sinti su mes bek conecta cu Gobierno. Mester stop cu
inversionnan (crea debenan innecesario) den cosnan cosmetico, cu no ta yuda
nos hendenan mes biba mihor y cu no ta crea desaroyo of cuponan di trabou
duradero. Inversionnan cu no ta yuda nos atende cu e pobresa cu ta sigui
aumenta, problemanan social cu ta bira dia pa dia mas y mas y e criminalidad cu
a bay for di man. No lubida tambe e problemanan grandi den enseñansa cual ta
e futuro di un pais. Mester kibra cu e cultura di miedo cu ta reina na Aruba.

Nos pueblo mester por expresa den forma acertivo, sin ofende y e berdad cu
mester wordo bisa. Nos mester por expresa nos opinion cu e meta pa cuestiona
autoridad of cosnan malo pa asina nos por drecha nos pais y duna oido real na
loke pueblo ta desea y anhela.No ta cuestion di ta contra un gobierno of ta di un
color politico, pero nos tin e derecho y mas ainda, e obligacion, di cuestiona y
expresa cosnan cu ta afecta nos tur y nos futuro generacion (nos yiunan y nos
nietonan).