Page 23 - HCCA- MAY 27,2015

Economia local lo wordo beneficia door di cooperacion riba
tereno di salubridad entre islanan Hulandes

Publication: Wednesday, 27 May 2015. Categoria: General

Health Care Conference Aruba lo trece beneficionan importante

ORANJESTAD (AAN): Riba prome, 2 y 3 di juni awor, Aruba ta sede di e
prome Health Care Conference Aruba (HCCA) cu participacion
di funcionarionan y ‘policymaker’ di Salubridad den e paisnan di Reino Hulandes.

E conferencia aki tabata un sugerencia cu a bini for di IPKO
(Inter Parlamentaire Koninkrijk Overleg 2014). HCCA ta tuma luga durante Siman di Salud na
Aruba y despues di e conferencia ta tuma luga tambe e Expo Salud
na Renaissance Convention Center.

Meta di e conferencia aki ta pa trece stakeholdernan hunto cu e meta pa discuti, bin cu
sugerencia y resolucionnan cu mester contribui na control di e gastonan den Salubridad
Publico na Aruba, pero tambe pa e otro islanan den Reino Hulandes. Pesey e participantenan pa e
conferencia aki ta procedente di henter Reino Hulandes.

E conferencia aki, segun Minister di Salubridad Publico Alex Schwengle a splica durante un
conferencia di prensa, ta sumamente importante pa Aruba. Por medio di e evento aki kier logra
yega na un tipo di cooperacion, principalmente entre e stakeholdernan di e sector aki, ya cu e
“cooperacion no ta un luho pero un necesidad”.Aruba, el a splica, tin un mercado chikito di algo
mas cu 100 mil habitante, cu ta haci’e hopi caro pa por haci cierto proceduranan medico
localmente. Pero si por cera un tipo di convenio cu un of mas di e islanan den Reino, lo brinda e
servicio di un facilidad, p.e. un Thorax Center unda ta realisa “open heart surgery”, pa un
mercado mas amplio. Brindando cierto tipo di servicio na un mercado di mas o menos 300 mil
persona, lo por controla e gastonan di e sector aki miho, pero tambe cu tin mas placa cu ta wordo
hinca den e economia local.