Page 62 - MIN JUS 12 MAART 2016

KPA: Prome detencion a cay den caso di homber kima na
Franse Pas

Friday, 11 March 2016 19:53
Comparti

“El a tuma un poco mas dia cu nos mes a spera pero cu masha orguyo Cuerpo Policial por anuncia cu nos
ta avansando den e investigacion andando relaciona cu e caso di asesinato di Bispo di Aña nobo na
Franse Pas”, asina Lito Lacle, vocero di Cuerpo Policial Aruba a indica diabierna atardi. Hunto cu e ekipo
di recherchenan, polisnan forensico, Ministerio Publico y cu cooperacion di nos coleganan na Hulanda, a
efectua e prome detencion.

Tabata diahuebs dia 31 di december 2015 algo pasa di 7:00am ora cu takelwagen a bay busca un auto
kima den Franse Pas a descubri un curpa kima den bahul di e auto marca Chevrolet modelo Celta
number A-14568. Mesora a start un investigacion, encabesa pa Ministerio Publico y haciendo uzo di e
ekipo di investigacion di Cuerpo Policial Aruba. Den oranan di merdia, despues cu e ekipo di
investigadonan a reuni, a dicidi cu ta manda e curpa Hulanda pa un investigacion forensico, mirando e
estado avansa di kemadura den cual a descubri e cadaver.

Na e laboratorio forensico hudicial na Hulanda a investiga e cadaver y te dia 1 di februari 2016 a logra
confirma cu tabata trata aki di e homber Alex Orlando Rojas Paz naci na Colombia di 37 aña di edad. Su
famia a indica na Polis cu desde dia 30 di december 2015 e tabata perdi.

“Pero awe nos coleganan di Hulanda a confirma na nos cu nan a logra detene un sospechoso pa nos”, di
acuerdo cu Lito Lacle. Ta trata aki di e homber di inicial R.A.R. di 29 aña di edad, di nacionalidad
Hulandes.

“E detencion aki ta un paso firme den direccion di por yega na conclusion di e caso. No por descarta cu lo
tin mas detencion den e caso, tanto aki na Aruba mes como na otro paisnan. E siguiente dianan, e
interogacionnan y e investigacion andando lo mester determina esey”, asina Lito Lacle, vocero di Cuerpo
Policial Aruba a termina bisando.