Page 10 - AUA BANK MAY 8

Melvin Tromp ta recorda MEP con Hulanda a para nan
gobernacion na 2007

Publication: Friday, 8 May 2015. Categoria: Politica

ORANJESTAD (AAN): Un otro tema cu Parlamentario Melvin Tromp a trece dilanti den e
conferencia di prensa semanal di partido AVP ta “Balanced Budget”. Esaki relaciona cu e
acuerdo cu a keda logra siman pasa entre Hulanda y Aruba.

E Parlamentario ta sigura cu no tin nada di implementacion di un CFT permanente. “Nos a
scucha esaki atrobe den boca di miembronan di oposicion, pasobra nan no por biba cu e realidad
y cu ta hendenan cu mi ta considera traidor y bendedonan di patria.” E Parlamentario a mustra
declaracion di Jane Semeleer, director di Banco Central.

E ehecutivo aki a bisa cu door di pega e Florin na Dollar, e moneda principal den comercio (8-
%), confianza den e moneda domestico a keda manteni. Den un otro parti di su declaracion
Semeleer ta bisa cu “Gobierno a haci un push significativo pa inversion di promocion den sector
turismo. Y awendia Aruba ta un di e destinacionnan mas popular den Caribe. Cada un di dos
bishitante ta Mericano. Ta kico nan ta papia anto cu e Florin ta devaluando y otro ta grita cu
Aruba ta den bancarota, mientras cu famia ta cobra placa na gran escala.”

Berguensa ta, segun e Parlamentario, cu na 2007 ora cu Minister Nicolai tabata encarga cu
Asuntonan di Antiya y Aruba, a papia e mesun idioma. Na momento cu Gobierno di MEP kier a
bay haci un prestamo na un banco Aleman, Hulanda a para Gobierno. No por a haci ningun
prestamo mas ni riba mercado local y tampoco internacional. “Esaki tabata e berguensa. Nan a
haye den nan boca di stoma antayera nochi y nan a keda den un silencio. Nan no tabata sa cu nos
tabatin e pruebanan.”

Pues e Parlamentario ta bisa cu e situacion cu e actual Gobierno a haye aden awor, ta loke esun
di MEP tambe a confronta na 2007 y cu e mesun idioma cu Nel a uza e tempo ey, Mike Eman a
hacie awor tambe. “Numa cu e tempo ey Hulanda a cera tur proceso pa prestamo y Minister Nilo
Swaen mester a raporta cada 6 na Hulanda. Pesey a bin aumento di leges, BBO, freezemento di
indexering, pa motibo di e accion cu Hulanda a tuma e tempo ey contra e Gobierno.”

http://www.diario.aw/2015/05/melvin-tromp-ta-recorda-mep-con-hulanda-a-para-nan-gobernacion-
na-2007/