Page 94 - Min Vos MAY 22

Bus di Salud a inicia e siman di Presion
Halto
Friday, 22 May 2015 13:53

Comparti

Mundialmente a conmemora e fecha di 17 di mei como e dia di Presion Halto. E tema cu a scoge e aña aki
pa conscientisa riba e riesgo di presion halto ta: “Know your numbers”; esta percura pa bo sa cuanto bo
presion ta.

Si bo sa cu bo presion ta halto, bo por actua y tuma medida pa asina yuda baha bo presion. Presion halto
tin consecuencia pa nos estado di salud. Algun ehempel ta: malesa di curason y ader, stroke, problema cu
riñon y otro problema di salud.
Na Aruba 50% di e hende homber adulto (25-64 aña) tin un presion halto. Di e hende muhe e cifra aki ta
33% esta un di cada 3 hende muhe tin presion halto. Di e personanan aki mas of menos mita no sa cu nan
tin presion halto. Pa e motibo aki ta asina importante pa bo controla bo presion y pa “bo sa bo numbernan
di presion”.

Plataforma di Promocion di Salud, cu ta consisti di IBiSA, Departamento di Salud Publico, AZV, SVB,
WGK y ImSan conhuntamente cu Kidneys297 y Fundacion CVA a cuminsa cu e siman di presion halto
como un siman di conscientisacion tocante di presion halto, specialmente e uzo di menos salo.

Dialuna dia 18 di mei a inicia cu e prome actividad, cu a encera salida di Bus di Salud pa duna servicio na
publico. Bus di Salud tabata para na e compleho di Power FM, Healthy Living Club, Bright Bakery na
Piedra Plat. Diferente empresa/negoshi a participa tambe cu actividad di conscientisacion den forma di
laga cliente purba pan sin salo, haci chekeo di presion, duna charla pa nan clientenan tocante di
alimentacion saludabel. Mientras cu Plataforma di Promocion di Salud a haya oportunidad pa comparti
cu publico algun informacion importante atrabes di programa radial.

Di e forma aki a habri e siman di presion halto cu diferente actividad cu a comparti cu comunidad, entre
otro informacionnan na radio, TV y prensa skirbi tocante di e peligernan di presion halto. Ta bon pa
comunidad ta informa kico presion halto ta, kico ta e peligernan, ken ta esunnan cu tin mas risico pa haya
e condicion aki, tipsnan con pa uza menos salo y con pa haci escogencia mas saludabel. Comunidad
mester ta consciente cu mester cuminsa cambia e estilo di bida pa uno cu ta mas saludabel.

Pa mas informacion por tuma contacto cu IBiSA na 5824987 of via nos facebook of website.