Page 44 - MIN ON 9 JULY 2015

Mayornan a gana kortgeding contra SKOA

Publication: Thursday, 9 July 2015. Categoria: General

ORANJESTAD (AAN): E siman aki Corte a trata e caso di un grupo di mayor cu no tabata di
acuerdo cu un decision tuma door di SKOA pa aumenta e schoolgeld y a bay Corte pa esaki.
Corte a tuma un decision cu a cay na fabor di e mayornan.

Abogado mr. Figaroa a representa e mayornan den e caso aki den e famoso aumento di
schoolgeld y airco geld. SKOA a pone den e carta pa mayornan cu si mayornan no paga e
schoolgeld aumenta y e placa di airco lo no por garantisa e muchanan un cupo na scol.

E caso a wordo trata algun siman pasa y a pidi Corte ordena SKOA pa no stroba e muchanan di
wordo inscribi of bay scol. Pa sorpresa di e Abogado, Corte a manda un decision por escrito
adelantando e fecha di veredicto.

Huez tabata di acuerdo cu e mayornan cu no por aumenta e schoolgeld y cu nan no por stroba
muchanan di drenta scol si nan no paga.

Den e veredicto Huez ta papia cu e principio ta cu enseñansa mester ta gratis. Y cu tin tratadonan
cu ta menciona esaki, ademas di leynan local cu ta papia di gastonan cu Gobierno mester cubri.
Esaki ta basicamente tur gastonan di e scol. E Abogado a señala cu basicamente e problema ta cu
tabatin un discusion entre SKOA y Gobierno riba e gastonan. SKOA tin hopi scol cu ta cay bou
di dhe y su gastonan ta hopi halto.

Dado momento, segun e Abogado, SKOA y Gobierno a yega na un palabracion cu por aumenta e
schoolgeld gradualmente den dos aña. Pero esaki tabata algo cu mayornan no por a acepta e
aumento. E caso trata awor tabata un kortgeding pa evita cu ta stroba e muchanan di bay scol. E
Mayornan lo mester hiba un caso den bodemprocedure pa trata e tema di aumento di school geld
y e airco geld.

E Abogado a recorda cu Tratadonan Internacional ta bisa cu Gobierno mester percura cu
enseñansa, por lo menos basico, mester ta gratis pa tur mucha por tin acceso na dje. E discusion
cu tin entre SKOA y Gobierno den ningun momento mester perhudica e muchanan. E dos
instancianan aki mester sinta na mesa y wak con ta soluciona e problema, unda cu SKOA ta exigi
mas placa.