Page 42 - MIN ON - MAY 20,2015

Prome encuentro di “Commissie Gedragscode” instala door
di Minister Hooyboer-Winklaar

Tuesday, 19 May 2015 16:05
Comparti

Dialuna ultimo a tuma luga e prome encuentro di e comision cu Minister Michelle Hooyboer-Winklaar a
instala recientemente pa yega na un protocol riba nivel nacional cu ta indica kico ta spera di tur actor cu
ta forma parti di e bida diario na un scol. Ta trata aki di e alumno/studiante, e maestro/docente y otro
personal cu ta traha na un scol y e mayor.

Durante ultimo temponan a pasa diferente tipo di incidente na diferente scol na Aruba cu a causa hopi
impacto den nos comunidad. A pesar cu tin diferente desaroyo positivo den enseñansa manera e
concepto di Scol Saludabel, e concepto di “Veilige School”, protocolnan contra termento na scol, e uzo di
e metodo di Disciplina Consciente y a pesar cu cada directiva di scol tin su reglamentonan y protocolnan
pa cu comportacion ta sinti e necesidad pa yega na protocolnan riba nivel nacional.

Esaki pa trece claridad entre otro den kico ta aceptabel y kico no ta aceptabel, kico ta e derechonan y kico
ta e debernan di tur esunnan envolvi den e bida diario na un scol y riba tur cos pa crea un clima positivo
y sigur (safe) den cada scol pa asina garantisa cu cada mucha den nos comunidad por desaroya optimal y
segun su capacidadnan y talentonan.

E “Commissie Gedragscode” ta consisti di representantenan di e directivanan di scol mas grandi, esta
Stichting Katholiek Onderwijs Aruba (SKOA), Stichting Protestant Christelijk Onderwijs Aruba (SPCOA),
Stichting Middelbaar Onderwijs Aruba (SMOA), Stichting Educacion Profesional Basico (SEPB) y Dienst
Publieke Scholen (DPS). Banda di esey e sindicato di maestronan, SIMAR, ta un partner sumamente
importante cu tambe ta representa den e comision.

Pa e parti di representacion social di comunidad y di mayornan e siguiente organisacionnan ta forma
parti di e comision: Fundacion Respeta Mi, Fundacion Telefon Pa Hubentud y Tienda di Educacion. Otro
partnernan den e comision ta Directie Onderwijs, Ministerio di Husticia y Instituto Pedagogico Arubano
cu ta hunga un rol primordial den formacion di nos futuro maestronan. E tarea di presidencia e comision
ta bou di encargo di un representante di Ministerio di Enseñansa y Famia.

Durante e “kick-off meeting” Minister Hooyboer-Winklaar a duna un splicacion di e tarea di e comision y
e miembronan a cuminsa intercambia pregunta y idea. Comienso di otro siman lo cuminsa cu e
trabounan pa por cumpli cu e tarea pa entrega un proposicion na Minister den dos luna. Tur partner den
e comision a compromete nan mes pa yuda y contribui cu nan experticio pa yega na un Protocol Nacional
di Comportacion pa Enseñansa na Aruba.