Page 12 - WEB
P. 12
WEB ta haciendo cambionan grandi den su infrastructura. E siman aki a haya algun ekipo
recip nobo, cu lo nifica cu pronto e sistema di boiler lo keda pa pasado. Un sistema cu ta
data di final di aña 1950. Riba e prome dia di siman, den pleno oranan di marduga, a start
e operacion di transporte dor di ATCO Aruba, pero bou supervision di Jozef Everon,
Manager Technical Affairs di WEB Aruba NV.
El a splica cu riba e prome dia a cuminsa pa 3’or di marduga y pa 6’or di mainta e mashin
ya tabata na su luga buta riba fundeshi y e transportenan aki lo sigui tuma luga durante
henter e siman aki te cu diasabra marduga pa mainta ora cu e ultimo lo yega tereno di
WEB.
Ta transporta un total di seis mashin pa WEB. Esaki ta e motor RECIP di 17 megawatt
cu, hunto tur seis, ta completa e totalidad di 102 megawatt di RECIP fase cuater.
Everon a sigui splica cu e mashinnan aki ta bay completamente 100% riba motor. Manera
cu e motornan aki ta den servicio, lo paga loke ta conoci como Powerhouse 2 cu ta nifica
cu tur e boilernan, cu Aruba a conoce pa decadanan largo, ta sali for di funcion. WEB for
di e momento ey ta bay draai completamente riba motor. E cambio aki, el a splica, ta
cuadra cu vision di WEB cu nan ta haci reduccion riba uzo di Heavy Fuel Oil. E ta nifica
un reduccion di mas of menos 820 bari pa dia di e Heavy Fuel Oil. Actualmente WEB ta
uzando 3800 bari di fuel pisa diariamente.
