Page 8 - HOSPITAAL

Ziektekosten Verzekering, AZV) na 1996, sigurando cu cada ciudadano tin acceso na un
cuido medico pagabel, di calidad y dirigi riba e pashent.

Awo e reto pa futuro cercano ta pa mehora calidad di cuido y na mesun momento mantene
henter e sistema pagabel y sostenibel door di renoba, usa mas tecnologia y mehora
eficiencia. Esaki ta loke candidato #6 Alex Schwengle a trece dilanti durante e presentacion
di Programa di Partido ‘Padilanti: 2017-2021’.

“No tin reto mas grandi, ni responsabilidad mas bunita cu crea un miho mañan pa nos
hendenan. Awe nos tey pa sigurabo cu nos ta cla pa tuma e responsabilidad aki y sigui hiba
Aruba Padilanti den cuido di nos salud, den deporte y den mehora e calidad di bida pa un y
tur,” Schwengle a bisa na e publico cu a reuni den salon di Renaissance Convention Center
pa e evento.

Cu e renobacion completo di dr. Horacio Oduber Hospital, inicia door di AVP, nos pais a crea
e condicionnan pa un di e sistemanan di cuido di salud mas moderno den region. E plan ta
pa elimina e obstaculonan di pasado den e servicio y brinda un cuido medico di calidad na
tur hende.

“Den e añanan nos dilanti nos lo sigura cu nos dokternan di cas, cu ta e prome liña di cuido,

ta dedica mas tempo na e pashent y enfoca mas riba prevencion di enfermedad. E
specialistanan medico, den e di dos liña di cuido, lo bay duna cuido mas intensivo door di e
facilidadnan nobo, di formanan di cooperacion mas directo y uso mas intensivo di tecnologia
medico,” e candidato di partido AVP a declara.

Schwengle y AVP ta kere cu e cambionan aki den e sistema no solamente lo mehora e
calidad y e acceso di e pashent na Cuido Medico pero tambe ta mehora e eficiencia y baha e
gastonan medico. Tin cinco area principal di enfoke, esakinan ta: 1. Aumenta e capacidad y
acceso na cuido pa e pashent; 2. Reduci e tempo di espera pa e di dos liña di cuido; 3.
Provee un cuido unda e pashent ta central; 4. Promove un bida saludabel; y 5. Trece tur
stakeholder hunto pa crea un sistema di cuido sostenibel: profesionalnan medico,
expertonan di cuido di salud, representantenan di pueblo y pashentnan.

“Bon cuido di nos salud ta indispensabel. Cu e inversionnan cu AVP den Gobierno a haci y e
renobacion cu ta bay continua, por sigura cu e cuido di tur nos pashentnan ta bay
‘Padilanti’!” asina Alex Schwengle, candidato #6 a finalisa bisando.