Page 3 - UTILITIES

Posted on 07/21/2017 2:37 pm AST | Updated on 07/21/2017 2:38 pm AST

ORANJESTAD - Despues di dos siman di e susedido, uzando 27 trahado entre esunnan
di NV Elmar y di contratista priva y dos experto di kabel for di Hulanda, awe NV Elmar
lo cuminsa uza e kabel grandi di 60KV atrobe. A kap e kabel dos siman pasa, cu
consecuencia cu mester a kita coriente den varios area y parti e coriente via otro
"feedernan".

Tabata diahuebs dia 6 di juli ultimo pa mas o menos 10:30am cu e compania di
construccion Odinsa, a informa NV Elmar cu nan a kap un kabel di coriente di nan na
altura di Young Fellow Bar & Restaurant na altura di Barcadera y cu e tabata bashando
azeta. Tecniconan di NV Elmar a activa mesora, a yega na e sitio, a logra tape e kabel y
contene e azeta pa asina evita cu e lo a rementa. E accion rapido tabata crucial pa salba e
kabel grandi riba cual ta pasa 60.000 volt di coriente.

E mesun diadomingo despues di e susedido, a yega dos experto di kabelnan cu ta traha
bou presion di azeta, a yega for di Hulanda pa asisti NV Elmar den drecha e kabel. Den
fin di siman pasa a cuminsa test e kabel atrobe y tur prueba a resulta exitoso. Awe mainta
a "comisiona" e kabel y e lo keda 24 ora bou "spanning" pa asina diabierna hinke den
funcion normal atrobe.

Mester menciona cu e trabou grandi aki ta costa mas o menos 400 mil florin y ta bou
responsabilidad di e compania di construccion Odinsa. NV Elmar a sinta na mesa cu
Odinsa pa sigura cu ta tene mas cuidao ora di cobamento riba e proyecto di Green
Corridor, pa evita inconveniencia na clientenan.

http://noticiacla.com/news/10372