Page 13 - AWEM 11-Mrt-2015

AWEMainta Diaranson, 11 Maart 2015 13

Mast di lus ta cay na veld di
Centro di Bario Noord (CBN)

CBN cu peticion pa yudansa

DIADOMINGO mainta a habri na un manera hopi fastioso

pa famia di Centro di Bario Noord. Mainta tempran CBN a ricibi
e noticia cu un di nan mast di lus di veld a bin abou. Ora a yega
veld nan a bin tuma nota cu e mast a cay y a destrui e dak di nos
bar/cushina. Dios gracias el a cay na momento cu no tin ningun
hende na veld.

Awor CBN ta percurando p’e instancianan concerni bin haci un
inspeccion urgente di e demas mastnan pa por garantisa seguridad
di nos peloteronan y coaching staff. Alabes pa tur cu ta haci uso di
nos Centro di Bario Noord diariamente.
Dialuna mainta ya DTI a bin na nos veld y a indica cu DOW t’e
instancia cu mester sigui yuda nos pa loke ta trata e inspeccion y
conseho cu nos ta desea.
E veld na CBN ta ser usa pa training di dialuna pa diabierna dor di e
team di peloteronan di mas chiquito cu ta di edad 5-6 te cu dobel A.
Pa casualidad diasabra awor weganan di Senior League mester
cuminsa riba nos veld. Cual ta haci di suma urgencia pa por yega
na un solucion rapido p’e situacion aki.

P’e motibonan aki mes CBN kier cuminsa mesora cu reparacion di
e dañonan n’e bar/cushina. Un reparacion cu ta un gasto inespera
y pa cual CBN no tin fondo presupuesta. P’e motibo a manda carta
pa sponsor di material cu ta necesario pa por realisa e reparacion
menciona y pa nos por haci uso di nos bar/cushina atrobe.
Centro di Bario Noord su organisacion di baseball ta drai riba
boluntario y no ta cobra p’e muchanan di bario bin siña y practica
e deporte di baseball.

CBN ta spera di por haya un cooperacion rapido y cu nos por
logra su meta proponi. Pa cualkier pregunta of sponsor por tuma
contacto libremente cu Shailiny Tromp na 592-4438. Di antemano
masha danki pa e sosten y coopercion.