Page 30 - TTC JULY 11

34 AWEMainta Diasabra, 11 Juli 2015

Invita pa The International
Economic Forum of the Americas

Prome Minister a
presenta un discurso
elocuente na Toronto
Global Forum

ORANJESTAD - TORONTO – Diahuebs mainta

Prome Minister Mike Eman, a presenta un discurso
na un audiencia consistiendo di hefenan di estado,
gobernadornan, dirigentenan di Banconan Central,
Ministernan y responsabelnan riba asuntonan
economico, durante Toronto Global Forum.
Prome Minister Eman a wordo invita pa ta un orador
den e foro mundial aki pa duna un discurso tocante e
desaroyo di Aruba y con a maneha retonan economico,
energetico y social.

Riba escenario di sala di conferencia ‘The Fairmont
Royal York Hotel’, Prome Minister Mike Eman tabata
den compania di Prome Minister di Greneda, Carriacou
and Petite Martinique, Keith C. Mitchell, Michael H.
Dunkley, Prome Minister di Bermuda y D. Orlando
Smith, Prome Minister di British Virgin Islands. Alberto
Bacó Bagué, Minister di Desaroyo Economico di Puerto
Rico a presenta e conclusionnan di e sesion di e dia.
Moderador tabata John Yearwood, Miami Herald.

Prome Minister Eman a duna un presentacion cu a trata
e ciclo di desaroyo di Aruba, relevante pa otro islanan
den Caribe, cu ta comparti e mesun tipo di historia,
pero tambe e mesun tipo di retonan den un economia
global y den un forma ‘scalable’, relevante tambe pa
economianan mas grandi mundialmente.
Un tema importante cu a keda ripiti den su discurso ta
pa crea un mihor conexion entre crecemento economico
y calidad di bida pa ciudadanonan, dos aspecto social-
economico cu mester bay man den man.

Algo cu Prome Minister Eman a trece dilanti den su
discurso tabata pa duna esnan presente un bon idea
con interesante un isla por ta como un ‘testing-lab’ pa
hopi idea y tecnologianan nobo cu ta importante p’e
comunidad global.
Prome Minister a introduci Aruba cu e mihor ayudo
posibel: “E Fofoti”. Cu un imagen di Aruba el a cuminsa
describi e resistencia, flexibilidad y forsa di e mata den
temponan seco.
Cu e descripcion paralelo aki el a cuminsa demostrando
con Aruba a enfrenta retonan den su historia, efectonan
economico mundial y particularmente con Aruba ta
desaroyando sostenibilidad riba diferente aspecto
importante pa su comunidad.

Den proximo edicionnan, nos lo duna un relato
mas amplio di e discurso di Prome Minister n’e foro
importante aki di taya mundial.