Page 1 - AM200925
P. 1
September 25, 2020
www.awemainta.com
www.facebook.com/awemainta
noticia@awemainta.com
583-1400
ARUGAS CU DONACION DI
AFL.10.000,- NA CRUZ CORA
DIARANSON mainta gerencia di Arugas a bishita Centro di Cruz Cora na
Dakota pa haci un donacion hopi special.
Sr. Roberto Geerman, Director di Arugas y sr. Paul Arends Gerente di
Operacion a ser ricibi pa Director di Cruz Cora sr. Michel La Haye.
Un cheque di Afl.10.000 a ser entrega na sr. Michel La Haye, kende a keda
sumamento contento cu e donacion, specialmente awor cu Cruz Cora a
extende su programa di asistencia di cuminda na famianan mas vulnerabel
cu a perde nan entrada dor di e pandemia di Covid-19.
Cruz Cora lo aumenta su esfuersonan na Aruba y enfoca riba yuda famianan
den necesidad cu E-vouchers pa cuminda y cuminda cayente p’esnan cu no
por cushina.
Den e prome fase di e programa di ayudo aki, Cruz Cora a entrega 4500
famia E-vouchers. Awor den e di 3 periodo di registracion ya a ricibi mas
cu 6000 peticion.
Esakinan aworaki ta wordo yama y ta wordo evalua, ya cu tin preferencia
pa yuda casonan mas vulnerabel.
Arugas ta contento cu nan donacion lo sirbi como apoyo directo n’esnan
mas afecta den e pandemia aki di Covid-19.
