Page 65 - KPA, APRIL 14,2015

Ciudadano ta haci denuncia publico di estafa contra
compania di construccion

Publication: Tuesday, 14 April 2015. Categoria: General

Un alerta pa Polis,DIMAS y Gobierno

ORANJESTAD(AAN) Den un denuncia publico haci, e ciudadano Ricardi Medina, di
nacionalidad Argentino y biba pa hopi aña caba na Aruba, ta acusa e Colombiano Wilson
Villalobo di e compania 4 Latina di ta comete estafa contra stranheronan, den su mayoria
hendenan ilegal cu no por acudi na e instancianan pa busca nan derechonan.

Medina, kende tin 11 aña biba na Aruba, den un declaracion duna a conta di e problema cu el a
bin ta confronta cu e compania 4 Latina pa cual e ta traha den mundo di construccion.

El a dicidi di haci e denuncia publico aki pa autoridadnan concerni haci nan investigacion,
despues cu el a wordo menasa door di trahadonan ilegal cu no a ricibi nan pago completo. “E
trahadonan ta kere cu ami a keda sin paga nan, pero ta Villalobo ta esun cu a paga solamente
20% di e salarionan e ultimo quincena. Esaki ta mesun cos cu el a haci cu otro hende caba y ta
conoci pa su estafa,” segun Medina a duna di conoce.

Medina a splica cu el a scoge pa keda Aruba pasobra e ta sinti cu e no tin conexion cu su pais
mas, pero cu e situacion cu e ta pasando aden ta pone cu e tin miedo pa su bida mirando tur e
menasanan di morto cu el a bin ta ricibiendo. El a conta cu el a wordo tuma den servicio door di
e compania di construccion como Manager, basa riba su habilidadnan, y tabatin casi 50 persona
trahando bou di dje. “Mi a tuma e trabou aki sin cu mi tabata sa cu e homber aki ta conoci como
un estafador, pa cual e no ta haya trabou den e mundo di construccion,” el a bisa.

Asina mes e compania di Villalobo a logra haya un contracto cu un compania grandi, unda cu
nan tabata masha contento cu e forma con e ta dirigi e obra. Esaki tabata algo cu su doño di
trabou no tabata contento cune y a cuminsa tuma represalia.

E ultimo quincena, el a ricibi apenas un 20% di e suma total cu e mester haya pa por paga tur e
trahadonan. Debi na esaki el a dividi e suma entre tur e trahadonan pa tur haya algo toch.
Sinembargo e problema a surgi ya cu e trahadonan a kere cu ta su persona a keda cu e placa,
principalmente despues cu Villalobo a mustra nan un ricibi bieu di pago cu si tabata cuadra.