Page 3 - AM211130

AWEMainta.com
Encuesta na Hulanda
Casi mita ta confirma di tin situacion
financiero fragil te cu critico
Aruba no ta Hulanda
UN encuesta haci pa algun instancia priva bou di 5000
Hulandes, a duna un bista di e situacion financiero den
varios cas di famia durante di e pandemia di Covid-19.
E encuesta a wordo organisa pa e.o. e oficina di
Deloitte, en cooperacion cu ING, tambe Nibud hunto cu
Universidad di Leiden buscando pa haya un idea di e
impacto financiero cu e pandemia tabatin den comunidad.
Casi 50% di esnan encuesta a mustra cu e situacion
financiero na cas ta hopi vulnerabel y hasta critico
pa diferente motibo, pero principalmente p’e falta di
entrada cu a bira menos of hasta bay perdi durante di e
pandemia.
Durante di e encuesta a wordo puntra n’e hendenan
riba nan situacion financiero na cas, e posicion cu nan a
tuma relaciona cu e problemanan aki y tambe kico nan ta sigui impone medida, sigui presiona comunidad pa saca
pensa pa futuro financiero, manera entre otro relaciona
cu gastonan di caso, spaarmento of nan planificacion pa
diferente asunto.
Segun expertonan un hende ta den bon estado financiero
ora cu e por cumpli cu su obligacionnan financiero sin
problema y cu e tin espacio pa aumenta su capacidad
financiero pa logra su metanan den futuro.
Di e cantidad di 5000 persona cu a wordo entrevista,
27% tin suficiente espacio financiero caminda nan ta
resta placa fin di di luna for di cual nan por spaar tambe
pa cualkier necesidad nan dilanti.
Otro 24% di e grupo aki nan placa ta yega pa cubri cu
tur nan gastonan, pero 25% ta hopi vulnerabel cu nan
situacion financiero, mientras cu otro 24% ta bibando
den un situacion cu no ta positivo segun resultado di e
encuesta.
E ultimo grupo aki ta di casnan cu no tin suficiente
placa pa pone un banda pa cualkier eventualidad cu por
presenta na cualkier momento y tampoco tin espacio pa
pone placa un banda y tur luna tin cu busca solucionnan
pa cumpli cu obligacionnan di tur luna.
DIFERENTE
Pues un situacion cu ta duna un otro bista riba e
situacion financiero di Hulanda durante di e pandemia y
consecuencianan di esaki, pero na mes momento compara
cu Aruba, e ta un situacion mucho mas positivo.
Aki na Aruba un gran parti di esnan cu ta labora den
sector priva a perde salario ora cu e pais a bay den un
lockdown caminda un gran parti lo bay keda sin trabou y
sin entrada ya cu e compania pa cual nan tabata labora,
DIAMARS30 NOVEMBER 2021| 3
lo no habri su porta mas.
Contrario na Hulanda, aki na Aruba e industria
mas grandi cu ta percura pa duna hende trabou t’e
industria turistico, mientras cu na Hulanda tin asina
tipo di industria, tin e sector agrario y cantidad di otro
posibilidadnan comercial.
Financieramente Hulanda ta bon para riba su pianan y
Gobierno a subsidia cantidad di negoshi cu fondonan cu
nan por a sigui dilanti, algun di nan e yudansa ta a base
di un prestamo, pero den otronan simplemente Gobierno
a dicidi di evita cu e negoshinan aki lo sera nan portanan.
Ta den e contexto aki ta keda un misterio con un pais
asina fuerte financieramente para, ta trata di soluciona
e situacion financiero di Aruba, exigiendo Gobierno pa
placa cu e no tin pa duna.
Ta presiona e grupo cu ta bon para ainda manera
trahadornan publico, pa entrega tambe parti di nan
salario, no como gesto di solidaridad pa cu esnan cu a
perde trabou den sector priva, pero pa yuda duna e caha
di Gobierno un bista mas aceptabel.
Esaki ta un proceso cu sin duda mester t’e meta final
pa futuro di pais Aruba, pero ta algo hopi cuestionabel
ora cu scucha un CAFT y un Gobierno di Reino papia di
busca solucion na un momento caminda ainda e peliger di
e pandemia y su consecuencianan, tin Aruba pasando den
momentonan masha incertidumbre.
No ta yuda cu Aruba tin un Gobierno cu pa di dos periodo
sigui, no tin un vision concreto di loke ta su maneho, di
loke ta su plan pa futuro pero e forma con Hulanda kier
yuda drecha cos n’e momentonan aki, no t’e forma mas
corecto cu por tin.
Na Hulanda ainda no a stop cu e asina yama “corona-
steun” cu ta algo manera loke ta conoci na Aruba
como ‘Loonsubsidie’ pues tin algun similaridad, pero e
situacion simplemente no ta comparabel, pero loke si ta
resalta ta forma con Gobierno demisionario Hulandes
hunto cu CAFT, kier impone solucionnan den forma di
medidanan riba un pueblo cu a perde hopi caba durante
di e pandemia.
Aki atrobe ta hunga un rol e falta di vision di un
Gobierno cu ta mustra di no tin e capacidad pa presenta
solucionnan cu ta na interes di henter pueblo na lugar di
presenta ideanan propio cu Hulanda a gara cu dos man y
cual e no kier laga bay mas.