Page 2 - DIGICEL
P. 2
12 AWEMainta Diahuebs, 2 Juli 2015
Cuerpo di Bombero pronto lo conoce dos “officier” nobo
Ferdinand Ponson y Gino Tromp
a gradua como “Officier”
DIANAN 22, 23 y 24 di juni ultimo dos miembro di Cuerpo di Bombero
y Rescate di Aruba a caba e opleiding riba nivel di “Officier” ofreci
pa Hulanda n’e islanan di Caribe Hulandes, bao di auspicio y
supervision di academia di Brandweer di Hulanda.
Ferdinand Ponson y Gino Tromp, hunto cu 9 otro candidato lo
ricibi nan “Rijksdiploma” p’e curso intensivo di nivel Hulandes
cu a cuminsa na november 2014.
Den un futuro hopi cercano, Ponson y Tromp lo ta den
funcion di “Officier van Dienst”, asina e Comandante di
Cuerpo di Bombero y Rescate Aruba, ing. Edward de
Cuba a anuncia.
E cursistanan – dos di Sint Maarten, un di Corsou, 6
di islanan BES y dos di Aruba, a reuni na Sint Maarten,
Aruba y Bonaire den transcurso di 8 luna pa diferente
parti di e curso cu a encera teoria y practica bao guia
di instructornan di e islanan y di Hulanda.
E bon noticia ta cu, despues di hopi esfuerso y sacrificio
personal, tur e participantenan a gradua!
Comandante ing. Edward de Cuba a expresa cu e
islanan a haya hopi elogio di e academia Hulandes p’e
lesnan cu a wordo duna pa instructornan local y prueba
di e bon nivel ta refleha tambe den e bon resultado di
e candidatonan.
Esaki tabata un proyecto piloto, de Cuba a bisa, a kita
e partinan “rough” y di biaha e academia a stipul’e
como e opleiding pa “Officier” pa Caribe Hulandes, cu
ta traha teniendo na cuenta e clima, e condicionnan y
sistema di e islanan.
