Page 8 - AAA APRIL 10

STA ta bringando pa tur trahador di AAA ta den
APFA

· Apr 9th, 2015
· Local

Aki un paar di dia sindicato STA lo bay sinta na mesa cu gerencia di AAA pa loke ta e CAO nobo cu ta
mustra cu lo mester bay sin problema den bista di STA, mirando e crecemento turistico cu lo bay bishita
Aruba den 2015 segun Diego de Cuba.

E ta sigui splica e trahadornan mester bay biba cu e dolor aki, vooral esunnan cu ta traha den veld
manera siguridad di terminal, departamentonan cu ta biba e cos aki den carni bibo. Tin sosten di e
departamentonan ariba tambe di administracion, di camara room. Pero e hecho ta keda cu tin cu bay
cuminsa negosha un CAO y akinan ta bisa cu e caminda cu e rabo di porco por bay krul, aunke cu no ta
mira motibo.
Na cuminsamento di aña tabata tin reunion cu Minister Oduber, riba e Toren di Control. Aunke cu no a
mishi e tema ey, sinembargo e mes a vocifera cu tur cos ta bon. A tende for di su propio boca cu cos ta
canando bon y no tin un motibo pa bay den panico pa loke ta un Contracto Colectivo nobo.
Si locual cu STA ta boga pe den e contracto colectivo aki ta tur hende cu ta trahando na AAA bay cay
bao di un solo fondo di pensioen cual ta APFA.
APFA ta di Aruba, y segun de Cuba, tin 139 hende na AAA cu no ta den APFA. Tin e resto di hendenan
cu ya ta bayendo pensioen y tin awor aki sigur un 60 pa 65 hende cu ta trahando ainda cu tambe ta den
APFA y si kier continuidad, si kier pa e fondo di pensioen keda existi, mester di sanger nobo pa hinca
placa.
E cos aki din pensioen ta continuidad, manera el a menciona. Si no tin un opvolger pa sigui hinca placa,
ta yega momento cu e fondo ta crash. Esey ta loke a splica gerencia di AAA varios biaha caba, e
deseonan di e empleadonan pa drenta e fondo di pensioen di APFA. Hasta na 2010 a bay reunion cu
prome minister Mike Eman, kende a bisa cu gobierno ta sostene e pensamento eynan 100%, pero cu e
sindicato mester bring’e den e contracto colectivo.
Esaki ta algo cu un compania cu ta 100% di gobierno, gobierno mester para keto y bisa e hunta directiva
pa tur hende bay APFA. No laga e cos aki bira un discusion na mesa di negociacion di un CAO, pasobra
e por desemboca den un accion, aunke nunca STA a pone un accion pa pone aeropuerto plat, pero
segun de Cuba, esaki no mester ta motibo tampoco, pero si ta pusha pa varios aña largo cu un terkedad
increibel, si e biaha aki e portanan ta hancho habri, e reglanan di wega a wordo modifica caminda cu ta
masha simpel pa AAA drenta e fondo di pensioen pa e 100 y pico trahadornan pa bira miembro di APFA,
segun de Cuba no mester haci mucho bochincha cu esaki y laganan drenta e fondo di pensioen. E no ta
bay costa e compania mucho cos. Por ta e por costa un of 1.5% mas, cual e compania por carga
facilmente.
Aparte di esey tin varios cos cu tin cu wordo regla ainda, pero esey lo bay regla esey cu AAA.
De Cuba a splica cu semper AAA ta traha un sistema caminda cu nan ta presupuesta un cierto suma pa
e contracto colectivo venidero. AAA ta un compania cu ta pro activo bezig. Nan ta hopi bon bezig den
opinion di STA, caminda cu nan ta presupuesta locual cu e CAO lo por bay costa. E sindicato no mester
tin miedo di esey. Locual cu nan tin miedo di dje ta cu e proposicionnan di sindicato, por surpasa loke
nan tin presupuesta pa e contracto colectivo.
STA ta kere cu nan por topa otro y esey no mester ta un problema, e sindicalista a comenta.

http://masnoticia.com/sta-ta-bringando-pa-tur-trahador-di-aaa-ta-den-apfa/