Page 32 - ARUBA BANK

80.5 miyon florin pa paga PPP

Nos tur por corda con nan kier a bin cu un Financial Transfer Tax pero na caminda nan a haya Banco Central,
Asosacion di Banconan, Camara di Comercio, ATIA y AHATA den nan caminda cu a desconseha e gobierno

di AVP pa bin cu e medida cruel aki. Y aki si Mike Eman a dobla rabo, bay na amen di tur e gremionan y no
kier a introduci e Financial Transfer Tax aki mas. Echo ta cu awe nos ta sinta cu e debe grandi di e
proyectonan PPP cu entrante otro aña lo yega te na un suma di 85 miyon florin pa aña y cu durante 25 aña

largo tin cu wordo paga sagradamente. Esaki ta e abuso grandi cu Mike Eman a comete contra nos pueblo.
Pero sin ningun tiki di berguensa y cu un cara di Hudas el a declara den Parlamento cu e ta orguyoso di a haci
e debe aki y cu nos tur tin cu bay pag’e.

Un lider iresponsabel

Con mas iresponsabel e destructor aki por ta siendo cu e sa cu den pasado e mes no por a maneha su propio
negoshinan y tambe otro negoshinan cu no ta dje of di su famia y cu hopi di nan a bati bancarota: EMCO,
Aruba Aloe, Interbank y ATV. Pues pa manda henter e pais aki bancarota no ta ningun arte pa sr. Eman. Nos
por corda tambe con Mike Eman a bisa cu e ta orguyoso di e debe y cu nos tur tin cu bay pag’e, pero e mes no
a percura pa paga e debe grandi cu el a laga atras den e Recovery Fund di Interbank pa cu e compania EMCO

cu ta suma na 1.9 miyon florin. Pakico te ainda e y su ruman no a paga e debe aki? Pues pa Mike Eman no ta
ningun arte pa haci debe, ya cu e no ta paga esaki toch! Ni su fiesta di cumpleaños riba su famoso brug e no
kier a paga y ta pueblo mester a paga 144 mil florin pa cu e celebracion aki.

Fecha di pago a yega

Awe na comienso di juli 2018 nos tur ta bay cuminsa paga pa un maneho financiero iresponsabel di 8 aña di
Gabinete Mike Eman. Siguramente nos di MEP no ta sinti ningun tiki di orguyo pa paga e debe astronomico
crea pa Mike Eman y AVP, pero e realidad amargo aki nos tur tin cu biba cu ne ya cu gobernacion ta un

continuacion y manera semper partido MEP mester paga e debenan biyonario cu AVP ta crea den nan
gobernacion. Echo ta cu e Crisisheffing y BAVP nos lo dal un par di paso atras, pero nos lo bin bek dilanti cu
pasonan gigantesco, firme y mas duro cu antes. Laga nos tur hala faha mara y finalmente nos lo vence. Cu fe y
perseverancia den nomber di nos Creador nos lo sigui biba y mas cu tur salba e pais aki pa nos futuro
generacionan.