Page 4 - AVB

Deportivo Nacional a bay cu e prome victoria

Wednesday, 28 June 2017 20:32
Comparti

Diamars anochi a tuma luga e prome wega final di e campeonato 2016-2017 di Arubaanse Voetbal Bond den un
stadion yen. Deportivo Nacional a bay cu e victoria di 3-1 riba SV RCA. E resultado aki ta pone cu Deportivo Nacional
ta ganando e serie best of 3 y ta pone un presion riba SV RCA, cu mester gana diasabra awor.

Desde oranan trempan fanaticonan a yega stadion pa apoya nan team. Durante henter e anochi e fanaticonan tabata
pasa dushi cu ambiente di musica y tabata grita y apoya e hungadonan. Desde comienso di wega, Deportivo Nacional
a cuminsa ataca e area di gol di RCA buscando pa anota gol. Na apenas 7 minuut di wega, Valdo Leocadia di
Deportivo Nacional a haya e oportunidad y a anota e prome gol. E wega ta continua fuerte, unda cu RCA a cuminsa
domina e wega y na diferente ocasion a tira riba gol pero no por a logra anota.

Den e di dos tempo Deportivo Nacional a anota un auto gol ora cu e keeper Jose Cruz no por a domina e bala na
momento cu defensa a mand’e pe y asina ta haci e wega 1-1. Ambos team a keda busca pa anota gol y na 60 minuut di
wega Kenroy Ranger a anota e di 2 gol. Deportivo Nacional a sigui ataca e defensa di RCA y Claudeone “Claudio”
Cavalante a anota e di 3 gol na 67 minuut di wega. E wega termina 3-1 pa Deportivo Nacional.

Presidente di AVB, Ing. Richard Dijkhoff, tabata contento cu e wega a tuma luga despues di tur loke a pasa. El a
gradici tur fanatico cu a presenta na stadion pa mira e wega, unda cu ambos ekipo a yega cu un fanaticada hopi
grandi. “E teamnan a haci hopi diferencia y por a mira kico fanaticada ta haci pa futbol”, Richard Dijkhoff a expresa.
Ambos team a bin pa gana, pero Deportivo Nacional tabata un tiki mas miho riba tereno cu RCA. Richard Dijkhoff ta
kere esunnan cu a sali gana e anochi tabata e fanaticonan cu a sigui e wega.

Coach M. Kelly di RCA a indica cu e wega no tabata pa nan y awo e stap cu nan lo tuma ta pa sinta cu e hungadonan y
papia kico nan lo haci pa diasabra. “Nos lo bay duna tur loke cu nos tin diasabra pa asina forsa un wega mas”, el a
expresa. RCA su meta ta pa bira campeon 3 biaha sigui y pa e motibo aki diasabra nan lo kier gana e wega.

Coach di Deportivo Nacional Dreyer Bracho tabata contento cu e resultado di e wega, unda cu e team a hunga un bon
wega. Dreyer Bracho a haya e oportunidad pa studia e team di RCA y cada hungado individual pa asina sa con nan lo
hunga durante e wega. Den e prome tempo na momento cu RCA a tuma control di wega, esaki a pone cu nan tabata
den un tiki problema, pero den e di dos tempo e coach a cambia e hugada pa asina por a bay cu e victoria. “Mi kier pa
nos gana, pero mi sa cu RCA lo bin mas fuerte y mi ta respeta esey. Mi ta respeta e coach di RCA pasobra e ta un
persona cu sa hopi di futbol. E hungadonan di RCA ta tremendo, pero mi tin un gran team cu curason grandi”,
Dreyer Bracho a expresa contento. E ta sinti cu nan tin presion pasobra nan a gana e prome wega y nan kier gana e di
dos wega pa asina termina cu e campeonato.

Diasabra dia 1 di Juli proximo e wega lo tuma luga na stadion di Dakota, unda cu RCA mester gana pa un di 3 wega
mientras cu Deportivo Nacional kier caba wega e anochi aki. AVB y e teamnan ta invita tur hende pa yega stadion
diasabra anochi pasobra wega ta cuminsa 8:00 PM. Entrada ta 10 florin pa adulto y 3 florin pa mucha.