Page 24 - combine diario

PAGINA 24 DIARIO
Hubentud Den Movecion
Salud Infantil:
Mucha y refresconan
Un tema sumamente importante nos colaborado boluntario, Alexei Spinoza ta trece awe den su
espacio “Salud Infantil”, y esaki ta e consumo di refresco door di nos mucha y hobennan.
“E refresconan ta e fuente di mas grandi di sucu agrega den e alimentacion di nos mucha y
hobennan. E consumo di e bebidanan aki ta aumenta e ingestion di caloria, un factor cu ta
contribui na obesidad den e hoben pa henter su bida”, Alexei ta alerta.
Kico por haci?
E hobennan mester:
- Reduci e consumo di refresco, bebida deportivo y otro tipo di bebidanan cu sucu.
- Aumenta e consumo di awa y di lechi abao den vet of sin vet.
- Tuma cantidadnan limita di juice di fruta cien por ciento natural.
“Pa apoya e hobennan den nan eleccion di bebida saludable, e famianan, schoolnan y otro
institucionnan cu ta atende cu hobennan mester:
1. Reduci e acceso di refresconan pa e muchanan.
2. Alenta e adolescentenan pa nan opta pa tuma awa, lechi cu poco vet of sin vet, of
cantidadnan limita di juice di fruta cien porciento natural.
3. Ademas, pa motibo cu e hobennan ta pasa un parti considerable di nan dia y nan siman
na school, ta di vital importancia pa nan dispone di opcionnan di bebida saludable na
lugar di esnan poco nutritivo.
4. E implementacion di politicanan escolar cu ta restringi e acceso na bebidanan cu sucu
ta un stragegia di salud publico, specialmente importante pa trata obesidad infantil y
mehora e salud nutritivo di e studiantenan.
“Entre e opcionnan pa mehora e entorno di alimentacion escolar (alimento y coi bebe) en
general nos por inclui:
1. Implementa normanan internacional vigente pa loke ta trata nutricion escolar,
relaciona cu alimento y coi bebe cu ta wordo ofrece of ta wordo bendi pafo di
horarionan escolar.
2. Revisa e politicanan di bienestar escolar na nivel regional, pa garantiza cu nan ta
inclui modelonan di nutricion cu ta permiti sirbi solamente alimento y coi bebe
saludable durante e oranan di school.
3. Examina e alimentonan y bebidanan cu ta disponible pa e studiantenan, incluyendo
e alimentonan y bebida competitivo cu ta wordo bendi de snacks of cafeteria y
unda nan por cumpra refresco for di machine, y determina asina si nan ta cumpli cu
standardnan riguroso di salud.
4. Educa e studiantenan riba nutricion y ofrece nan solamente alimento y coi bebe
saludable, pa asina sigura un mensahe coherente tocante nutricion saludable.
DIARANZON 28 JANUARI 2015
E importancia di crea un
bon relacion entre mayor
y yiu for di chikito
Ken ta siña nos con pa ta un tata, of un mama? Kico mester haci
pa nos haci di e baby di awe un adulto sano den futuro?
E relacion entre mayor y yiu durante e prome añanan di bida di
un mucha tin un importancia fundamental, segun cada dia nos
como psicologo por constata den nos consulta.
Ciencia ta aporta tips nobo pa un educacion mas emocional y
mas probechoso den nos muchanan.
Hinca den otro na un manera eficiente y eficaz e bida familiar
cu esun laboral, ta cada bez mas dificil.
Mayoria di biaha nos ta yega cas cansa y nos no tin suficiente
pasenshi pa dedica un rato agradable na nos yiunan. Pa nos
logra ta mihor mayornan nos mester pone cada dia un tiki mas
di nos banda, pasobra esaki no ta un tarea senciyo.
Bon consehonan pa mayornan logra:
- Crea tempo y espacio pa por pasa un rato bo so cu cada
un di bo yiunan, cada bez cu bo por, y sin interferencia
di ningun otro hende.
- No worry si bo cas ta un tiki bruha den dia, tanten tur
hende cumpli cu su obligacionnan, pero si como mayor
por exigi pa un y tur participa den haci limpieza di cas
anochi. Con cu bo mire, e cas ta di henter e famia.
- Siña planifica pa probecha e bon oportunidadnan
mirando cu por aparece acontecimentonan no planea.
- No sconde bo sentimentonan maske no semper nan
ta positivo. Esaki ta emicionnan cu bo yiu lo haya y
mester siña con pa enfrenta nan.
- Den famia planea un actividad hunto, cu por bira un
tradicion y cu no ta wordo kibra si no ta door un motibo
di hopi peso.
- Laga sa cu tin unda cu bo no kier bishita na bo cas,
pasobra bo kier sintie como e teritorio priva di bo cu bo
yiunan.
- Si tin algo cu a molestia causa pa un of otro miembro
di bo famia y bo no kier trate cu palabranan, anto skirbi
un note y laga e persona (nan) concerni lese.
- Si bo yiunan ta haci hopi boroto ora nan ta den cas,
propone cada dos siman un dia di no papia duro, no
grita, ni discuti cu otro.
- Semper tin den frishider un postre of algo dushi pa
come ora boso ta sinta come hunto, pa asina disfruta
e cuminda mas pasobra e momento ey mester ta di
bienestar y pa tur hunto disfruta.
- No haci cosnan cu bo yiunan masha bon ta capaz di haci
riba nan mes. Asina nan ta siña bira mas independiente
y espontaneo.
- Acepta bo yiu den tur su etapanan. Mayornan mester
sa cu e proceso di crecemento tin su ups & downs.
Ningun di bo yiunan, mescos cu tabata bo caso ora bo
tabata mucha y adolescente, lo tin un proceso perfecto
di desaroyo. Si ta sinti su mes stima y acepta e lo sinti
su mes balora tambe pa su aciertonan y no desprecia
pa su defectonan. E lo siña stima su mes durante su
desaroyo y despues como adulto.
- Sali cu amigonan y comparti cu nan actividadnan
familiar tambe. No depende unicamente di bo famia pa
satisface tur bo necesidadnan social.
- Siña bisa NO ora esaki ta na su lugar.
- Pasa tempo tur siman bo so cu bo casa, sin mucha rond
ni otro distraccionnan, un bida den pareha saludable ta
transmiti paz y bienestar pa henter e famia.