Page 47 - flip

“Hopi biaha hobennan ta wordo pone den luz negativo ora nan haci cosnan menos bon, pero a
bira momento pa pone luz riba nan ora nan ta destaca. Esey ta e meta di Poder di Hubentud. Otro
hoben cu ta destaca pa trabounan social y boluntario ta Elson del Valle. Un hoben cu ta haci su
famia orguyoso, un hoben cu ta haci su amigonan orguyoso y sigur un persona ta haci nos como
Gobierno orguyoso di nos hobennan”, asina Minister Paul Croes a bisa na ocasion di e siguiente
nominado di Poder di Hubentud. Diahuebs atardi durante e apertura di Kiwanis International
congress 2015, Minister Paul Croes a sorpresa Elson del Valle hunto cu representantenan di
ATHA, Departamento di Cultura Freddy Montoya y e team di Poder di Hubentud cu e
nominacion. Famianan y miembronan di Kiwanis Key Club a forma parti di e sorpresa agradabel
aki. “Tur hoben cu haci cosnan pa otronan sin pidi algo a cambio merece e luz positivo riba nan
y esey ta meta di e proyecto”, Minister Paul Croes a menciona.
Elson, un hoben studiante di Colegio Arubano y tesorero di Kiwanis Key Club a keda super
emociona ora cu el a mira su famianan presente y a nomin’e como un hoben cu tin poder pa haci
trabounan social pa comunidad. E forma espontaneo y positivo di e hoben aki ta dun’e tur credito
pa e bira un hoben pa ricibi e guia necesario pa ricibi e premio na final cu lo tuma luga den
Augustus. Dia 12 di Augustus ta e dia internacional di Hubentud y lo ta e dia cu finalmente lo
saca e Poder Hoben di Aruba pa 2015. “Ask not what your country can do for youth, but what
youth can do for your country”, uzando asina e palabranan di Presidente John F. Kennedy den e
sentido pa hobennan, Minister Paul Croes a bisa. Elson a bisa cu e ta hopi contento cu e
nominacion aki y e no a spera esaki y ta cla pa enfrenta e reto y bay cu e premio maximo di 5000
florin na final.