Page 5 - AWM 16 OCT,2015

AWEMainta Diabierna, 16 Oktober 2015 5

Elogio y
reconocimento

special pa
Maritieme Politie

Nan a hunga un rol crucial den
rescate di piscadornan siman pasa

ORA CU e melding a drenta for di Centrale Post cu

via di Warda di San Nicolas a yega informacion cu lo
tin piscadornan perdi riba lama, Brigadier Davidson
Eduards y su coleganan di biaha a bay den accion.
E nomber di e boto envolvi a zona conoci y nan a corda
riba un boto cu nan a touw yuda bolbe bek tera un siman
prome. E boto tabatin problema cu motor y Eduards a
saca su potret y Maritieme Politie tabatin datonan di e
persona envolvi.

Di biaha Eduards a check su telefon pa detayenan riba
e potret, e color di e boto, registracion, e piscadornan
cu tabatin abordo ora cu nan a touw e boto, etc.
Hunto cu su colega a compila tur informacion extra
cu nan tabatin, incluyendo unda nan a topa cu e boto
den problema e siman prome, y a comparti esaki
cu tur nan contactonan pa cu casonan di rescate.
P’e accion rapido y determina y e atencion extra cu
Maritieme Politie ta duna na detayenan ora di haci nan
trabao, a logra rescata e personanan perdi.

Alto Comisario mr. Adolfo “Dolfi” Richardson a bisa, cu
p’e caso specifico aki, pero pa hopi mas esfuerso diario di
e team di Maritieme Politie, el a dicidi di yama nan aden y
entrega na esnan envolvi den e rescate un reconocimento
y percura pa comparti cu comunidad con orguyoso
top di Cuerpo Policial ta cu e trabao di e team aki.
Dolfi Richardson a splica cu un di e Directornan di
Kustwacht a comenta na dje, na momento di e rescate,
cu su hendenan a haci hopi bon trabao.
Esaki tabata un momento di orguyo sigur p’e chef,
pa sa cu ta dor di e perseverancia di busca y provee
informacion asina valioso di parti di Maritieme Politie
a logra di salba bida di e piscadornan y p’esaki ricibi
un pluimpje di un instancia pafo di Polis, ta algo hopi
valioso.

Esaki ta confirma cu miembronan di Maritieme Politie
ta tuma nan trabao na serio y ta bay “the extra mile”,
Richardson a bisa, gradiciendo nan di curason y hopi
contento cu con e team ta funcionando.
Hopi biaha nan ta haci rescate riba lama, pero poco
informacion di nan trabao ta conoci den comunidad.
Eduards a agrega cu e trabao no ta facil, pasobra ademas
di e solo fuerte, e condicionnan di lama ta cambia
constantemente. E team a keda concento cu nan trabao
ta wordo aprecia y reconoci.