Page 8 - MIN ECEM 26 JUNE 2017

perde cu e ‘WEB-Hedging’, por a wordo uza pa paga e inversion di e parke di
molina ‘Vader Piet’ of cualkier otro parke di molina. Haciendo esaki, tampoco
sumanan miyonario mester a wordo paga anualmente na un compania
stranhero. Asina e placa por a keda Aruba y hasta wordo uza pa realmente baha
e prijs di coriente!

E aventura di e ‘WEB-Hedging’ a costa pueblo, minimal 315.4 miyon florin. Y
manera e prijs di crudo a baha siman pasa atrobe bou di US$ 50, esaki lo nifica
cu pueblo lo perde ainda mas placa. Como doño di WEB Aruba y Utilities
Aruba, pueblo mester exigi cu tur esunnan envolvi den e ‘WEB-Hedging’,
entrega nan retiro y cu Ministerio Publico tambe cuminsa un investigacion
independiente y transparente, net manera a sosode na Corsou. Pueblo no tin cu
acepta e excuus y e retiro politico di solamente e ex-director di WEB Aruba. E ex-
director nunca por a tuma un decision asina riba su mes, sin e conocemento y
aprobacion di e minister di Energia, e director di Utilities Aruba y e huntanan di
comisario di WEB Aruba y Utilities Aruba. Tur e personanan aki tambe ta
responsabel. Tampoco pueblo tin cu warda te ora algun persona cu tabata
envolvi, pero cu awe no mag di participa mas den e ‘partimento di bolo’, cuminsa
basha bou, riba social media, kende tur si a haya kico. Pues algo similar loke ta
pasando actualmente cu ‘Carubbian Festival’. Pueblo no kier un ‘confesion
publico’ awor. Pasobra si no tabatin un ‘sacamento for di e grupo privilegia’,
pueblo nunca lo a haya sa kende tur tabata haya kico. Nunca pueblo lo a haya sa
con stinki e beerput ta hole. E ladronicia publico y e corupcion gubernamental,
banda di e decadencia acelera di moralidad y etica, ta cabando cu e pais aki.
Husto esunnan cu a pidi pueblo su sosten pa represent’e, cu a huramenta pa
defende pueblo su interes y cu mester duna e bon ehempel, ta fayando
barbaramente. Ningun campaña electoral miyonario, por tapa e ladronicia di e
‘WEB-Hedging’!