Page 9 - AVB

AWE TA TUMA LUGA WEGA FINAL PA

CAMPEON DI FUTBOL DIVISION DI HONOR

July 4, 2017 Admin Uncategorized Leave a comment

ORANJESTAD, Aruba – Awe diamars pa 8:00pm ta inicia e ultimo wega den e
“Best out of 3” den final di e liga Division di Honor di Arubaanse Voetbal Bond pa
e campeonato 2016-2017. E dos ekiponan SV RCA y Deportivo Nacional a yega
final. Deportivo Nacioal a gana e prome wega y SV RCA a gana e di dos wega
diasabra ultimo pa cual e ultimo wega ta tuma luga awe diamars den Stadion
Guillermo Trinidad na Dakota. Entrada ta 10 florin pa adulto y 3 florin pa mucha.

Sport Vereniging Racing Club Aruba

A funda SV Racing Club Aruba (RCA) dia 15 di februari 1934. E team a sa di
crece den e ultimo 83 añanan te bira un organisacion di riba 300 futbolista. Nan
ta parti den division di infantil, hubenil, hoofdklas, damas, 35+, 40+ y 50+.
Roland “Ditto” Acosta ta Presidente di e organisacion, mientras cu Juan Valdez ta
e coach di e ekipo di 25 futbolista cu ta hunga den e division di Honor. Historia a
conta nos cu den pasado, e ekipo di RCA a logra titula campeon na 34 ocasion. E
ekipo di RCA ta e prome campeon di pais Aruba na aña 1986 y ta e prome team
di Aruba pa bira campeon Antiano na aña 1966. E ultimo biaha cu SV RCA a bay
cas cu e trofeo di campeon tabata den e campeonato di aña 2015-2016, e tempo
ey contra SV Dakota. SV RCA ta conta cu sosten di su patrocinadonan Big Wheel
Lottery y Powerade (Tropical Bottling Company).

Deportivo Nacional

A funda Deportivo Nacional dia 15 di Maart 1970 y desde e tempo ey a haci
historia den e deporte rey di futbol. Nan ta profila den tur liga di futbol, manera
ta division mini baby, baby, Lifida A, Lifida B, Mayor, Junioren y Division Honor.
Tambe nan ta den e liga veterano 35, 40 y 50. Mas o menos 200 futbolista ta
hunga pa Deportivo Nacional den tur division incluyendo e muchanan cu ta
hunga den Lifida. Desde fin di aña 2015 a inaugura nan veld di bala nobo situa
na Alto Vista. Presidente di Nacional/Coca Cola ta Silo Brete y e nan entrenador
ta Dreyer Bracho. Ultimo biaha cu Nacional a bay cu e titulo di campeon tabata
na aña 2006-2007, pues 10 aña pasa. Den nan trayecoria a titula 4 biaha
campeon y 4 biaha sub campeon. Deportivo Nacional ta conta cu sosten di Coca
Cola di Tropical Bottling Company.