Page 21 - MIN ON - JULI 7 ,2015

Bida ta worde dirigi door di e escogencianan cu nos haci

Publication: Tuesday, 7 July 2015. Categoria: General

Minister na graduadonan di EPB Oranjestad

ORANJESTAD (AAN): Un biaha mas Renaissance Convention Center a bisti su mes di gala cu
e tema di Hollywood, al estilo di entrega di premionan Oscar. Na entrada un modelo
bodypainted den colornan oro a yama tur 201 graduadonan bonbini. Director di EPB Oranjestad,
Ida Lamp a elabora riba e cambionan di e sistema nobo y su frutanan, na unda e
ontwikkelingslijn a hunga un rol significativo den e resultadonan.
T’asina cu desde EPB a dicidi pa inicia e sistema nobo “School Chikito den school Grandi” cu e
meta general basa riba ontwikkelinglijn, e motivacion cerca alumnonan ta hopi notabel. Desde
tweede klas ta cuminsa cu evaluacion y asina ta sigui e “stroomlijn” te final, asina e director a
splica na tur esunnan presente.

Invitado di Honor Juf. Zoraima Delle cu ta un ex alumno di EPB Oranjestad tambe a hiba un
discurso elocuente y a conta na unda e tabata y unda el a yega awe. Algo pa entusiasma e
graduadonan pa sigui despues di esaki un poco mas y profesionalisa nan mes.

For di 247 candidato cu a haci nan examen, un total di 201 a logra nan meta. E miho graduado pa
EPB pa nivel di Arbeidsmarkt ta Maria Camila Yepes Osorio. Pa nivel di Uitstroom ta Santiago
Montemiranda y pa nivel di Doorstroom ta Carlos Montano Concepcion. Mihor graduado EPB
Oranjestad 2014-2015 a resulta den e alumno Santiago Montemiranda.
Minister Michelle Hooyboer–Winklaar a toca e tema di Team Work y di escogencianan. E
importancia di tuma tempo di scoge bon, pero no tuma decisión y keda sin bay den rumbonan
desconoci. Tin decisionnan pa con robes cu e ta, ta forma un persona. Educacion di buki y no
worde forma no ta balansa. Tin dos influencia, bo dedicacion y bo escogencia y combina nan dos
ta forma e balansa.

http://www.diario.aw/2015/07/bida-ta-worde-dirigi-door-di-e-escogencianan-cu-nos-haci/