Page 61 - MIN.VOS APRIL 16
P. 61
Interes for di profesionalnan di Merca pa conferencia di
Aruba
Publication: Thursday, 16 April 2015. Categoria: General
Conferencia di salud…
ORANJESTAD (AAN): “Ta masha importante pa no solamente organiza e evento, pero tambe
pa conta cu participantenan di calidad y oradornan di reconoci mundialmente. Den e cuadro ey
nos ta atendiendo varios di e conferencianan aki cu tin e mesun meta aki”, asina Dr. Alex
Schwengle, Minister di Salud Publico y Deporte a duna di conoce despues di a atende algun
reunion na Merca recientemente.
E di 12 Congreso Mundial Anual di Cuido di Salud convoca pa esunnan cu ta tuma decisionnan
den tur sector di salud, esta e “Health Care Convention”, a ser teni e aña aki na Washington, DC.
E congreso a conta cu mas di 900 participante y 22.000 ehecutivo cu a participa. Aruba tambe a
presencia e convencion aki hunto cu un delegacion encabesa pa Minister Dr. Alex Schwengle.
E conferencia a toca temanan interesante riba cuido di salud, bienestar, prevencion, incapacidad
y ausencia y a conta cu un audiencia hopi sofistica, avansa di experiencia e inteligencia. Durante
seis sesion den e agenda pisa, por a conta cu un variedad di presentacion cu pensamento
stimulante.
World Health Care Convention 2015, e convencion mas grandi na mundo, a reuni durante tres
dia pa discuti iniciativa strategico pa cu e futuro di asistencia medico. Mas di 150 orador a
comparti sabiduria, plannan innovativo y un miho maneho.
E booth di Aruba a sirbi pa promove e prome “Health Care Convention Aruba 2015”, di cual por
bisa cu tabatin masha interes pa tende mas di e conferencia y pa sa mas con pa participa. Entre
dia 1 te 4 di juni 2015 ta tuma luga na nos isla e prome Health Care Conference Aruba
(www.hcca.aw), un idea cu a sali for di e ultimo reunion Inter Parlamentario di Reino Hulandes
(IPKO). E enfoke durante e conferencia lo ta pa yega na mas y miho colaboracion of pa
reenforsa e colaboracion entre e partnernan den Reino pa yega na solucionnan pa retonan comun
den ramo di salubridad en general.
