Page 46 - MIN SJA 8 SEPT 2015

28 AWEMainta Diamars, 08 September 2015

Cuminda ta un
necesidad pero
Cushinamento
ta un ARTE

Bario Chef ta yudabo haña les di cushina

DESPUES di seis siman e proyecto piloto Bario Chef a

termina cu smile rib’e caranan di e
participantenan. Fundacion MOBIS y Centro di Bario
Brazil a cuminsa cu e proyecto aki seis siman
atras cu e meta pa ofrece habitantenan den bario di
Brazil e oportundidad di haña les di cushina.
Centro di Bario Brazil a hasi un peticion na Fundacion
MOBIS pa trese les di cushinamento den e centro di
bario. Fundacion MOBIS a lanta aña pasa cu e meta pa
sostene NGO y en particular centro di barionan den e
desaroyo di bienestar general na Aruba.

Fundacion MOBIS ta asisti entre otro den crea
programacion nobo, aumenta e cantidad di boluntario
y p’e centro por genera entrada.
MOBIS a mira e situacion na centro di bario y a conclui
cu no tabata facil pa traha ful un cushina
nobo unda hopi hende por haña les di cushina.
Locual a ripara ta cu centro di bario tin hopi espacio y
asina a bin n’e idea pa crea un cushina mobil.
A crea diferente stations unda un of dos persona por
traha y siña cushina. E idea aki a wordo sostene door di
CEDE Aruba cu a pone fondo disponibel pa por ehecuta
e proyecto Bario Chef. Subway a duna nan sosten y
ademas di esaki tabatin chef nan boluntario cu a inverti
di nan tempo personal. Door cu e cushina ta mobil, Bario
Chef lo move di un Centro di Bario pa otro unda asina
mas hende den diferente bario por hañ’e oportundiad
di haña les di cushina.

E tipo di cuminda cu lo siña cushina ta depende di e chef
boluntario y su experticio. E dos chef nan cu a yuda na
Centro di Bario Brazil a duna les den cuminda crioyo.
Fundacion MOBIS tin dos chef mas pa duna les na Centro
di bario Noord y Playa Pabao. Bario Chef ta forma parti
di e programacion Bario Bibo unda diferente sorto
di proyectonan por wordo implementa den centro di
barionan. Bario Bibo ta un programacion cu e meta pa
reactiva e centro di barionan y habitantenan di e bario.
Bario Chef t’e prome proyecto y den futuro lo sigui cu
diferente sorto di proyectonan. E idea ta cu e deseonan y
necesidad di e bario ta wordo cubri den e proyectonan di
Bario Bibo den e forma di conecta comunidad cu centro
di barionan, fundacionnan social y comercio.