Page 10 - CITGO 15 JUNE 2017

Minister Arends ta splica preferencia pa trahadornan local
den refineria

Wednesday, 14 June 2017 20:21
Comparti

Trabounan den Citgo ta bayendo full swing y e siguiente fase di trabou di rehabilitacion di e refineria ta den cuminsa.
Un pregunta cu ta circula hopi riba tanto medionan social como den pueblo ta con ta para cu trabou pa localnan den e
refineria. Minister di Economia Richard Arends ta amplia riba e punto aki. Den un splicacion hopi cla, Minister Arends
a aclarea un que otro riba e tema aki, kitando di e forma aki tambe e preocupacion reinante cu tin.

Minister Arends: "Ora un aña pasa a firma e acuerdo definitivo cu Citgo Aruba Refinery NV, a keda acorda cu un maximo di 20% di
trahadornan di Citgo por ta di afo. 80% di e trahadornan di Citgo Aruba Refinery mester ta local." Minister a bisa cu nunca antes e condicion
di quota aki a wordo poni den contractnan cu otro operadornan di e refineria. Minister Arends ta bisa di ta masha satisfecho con e condicion
aki a wordo poni den e contract definitivo door di expertonan di e team negociador. "E team a yega na e formula aki unda e quota a keda
ahusta te na un maximo di 20% di trahadornan di afo y 80% local. Pa loke ta trata e 20% aki a yega na acuerdonan kico ta e pasonan cu
mester tuma pa por traha den e refineria. Compara cu den pasado, Departamento di Labor y tambe Refineria di Aruba NV ta bay tin un rol
hopi mas activo pa acesora y analisa si di berdad cierto experticionan no ta disponibel aki na Aruba."
Minister a splica con e proceso ta tuma lugar. "E aplicacion ta drenta y mesora Refineria di Aruba NV hunto cu Departamento di Labor ta
haci nan evaluacion y ta manda contesta sea Citgo of e contratista si tin un persona local disponibel pa e trabou ey. Obviamente Citgo Desk
cu a wordo instala aña pasa tin un data base amplio di experticionan cu tin na Aruba mes y esey tambe ta yuda den e proceso pa loke ta trata
trabounan di rehabilitacion di e refineria."

Tambe Minister a bisa cu tanten e contract di trabou di e empleado di exterior ta vigente - e permiso mester wordo renoba anual of bi-
anualmente - pa Citgo esaki ta conta pa e empleado y famia y pa esnan trahando cu contratista e permiso di trabou ta conta pa e empleado
so. "Esaki tambe ta loke a keda negosha pa regula un poco mas miho e fluho di importacion di labor den cierto experticio cu no ta disponibel
aki na Aruba. Trahadornan local semper tin preferencia riba trahahornan di afo. Esey ta hopi cla poni den e contract firma entre gobierno y
Citgo Refinery Aruba NV. "