Page 3 - HOH 7 MAART 2016

Clinica di Dialyse di Hospital mas activo den siman aki di
Riñon

Sunday, 06 March 2016 22:36
Tweet
Comparti

“Diahuebs awor ta dia di Riñon y internacionalmente ta celebra e dia aki y e biaha aki lo ta enfocando
specialmente riba nos muchanan,” asina Julienne Panneflek, Assistent Zorgmanager na e Clinica di
Dialyse na Dr. Horacio E. Oduber Hospitaal, a duna di conoce. Den e cuadro aki Hospital lo dedica e
siman aki na suministra mas informacion posibel riba salud y prevencion.

Ta importante pa educa e muchanan di jong caba riba hiba un bida mas saludabel pa evita cu nan ta haya
un enfermedad cronico.

En bes di celebra riba un solo dia, e aña aki lo tene un siman cu diferente actividadnan cu enfasis riba nos
muchanan. Lo asisti na 5 diferente scol basico, cuminsando dia 8 di maart cu e alumnonan di un klas di
Pieterboer School, Scol Basico Kudawecha, Scol Basico Washington y Maria School pa duna informacion
riba con pa biba saludabel.

Lo probecha e bishita na e studiantenan pa conta nan di e funcion di nos riñon, na un manera cu e
muchanan por compronde y pa nan ta mas alerta di kico nan ta come y pa nan move mas, pasobra esey
generalmente ta bon pa bo salud.

Diahuebs dia 10 di maart cu ta dia di riñon mes lo tin un “Opendag” na Clinica di Dialyse na Hospital
unda ta invita henter comunidad pa cera conoci cu e clinica. Eynan lo duna informacion relaciona cu e
tratamento cu ta brinda eynan, por conoce e mashinnan y lo por ricibi contesta di e specialista y
dietistanan presente. Riba e dia lo por controla presion y sucu tambe.

Pa finalisa e siman na un forma saludabel y alegre, lo tin un caminata completamente gratis dedica na
nos muchanan y siguramente hunto cu nan mayornan. Registracion lo cuminsa for di 4:30pm pero e
caminata mes lo start 5:30pm for di Arashi pa Fishermen’s Hut y regresa back pa Arashi. Si muchanan ta
haya e distancia di 5 kilometer largo, anto nan por bini libremente cu nan bicicleta of stroller. Lo tin awa
y fruta gratis pa tur participante.