Page 37 - ata july 17 2015

Mercado Colombiano por nifica diversificacion di turismo
Latino Americano

Publication: Friday, 17 July 2015. Categoria: General
Ronella Croes CEO di ATA:

ORANJESTAD(AAN): Eliminacion di visa pa ciudadanonan di Colombia, tin un proceso pa
cana prome cu esaki keda completa pero CEO di Aruba Tourism Authority, Ronella Croes ta
mira hopi cosnan positivo pa turismo di Aruba den e decision aki.
“De facto ATA ta parti di e proceso di decision pa elimina e visa pa ciudadanonan di Colombia,
y tin cu bisa cu no ta un decision facil y nos ta compronde tambe cu tin diferente factor cu mester
tene na cuenta.
Colombia tin su motibo pa cual a introduci e visa y mester tene na cuenta e parti di siguridad y e
motibonan aki a pone cu mester tuma tempo y ora cu elimina esaki mester realisa di con ta kite
tambe.
E motibo- y factornan aki ainda tin cu worde evalua pero pa e parti turistico tin hopi posibilidad
pa motibo cu e mercado di Colombia ta un di e mercadonan di Latino America cu ainda ta
mustrando un crecemento economico y nos no mester lubida cu otro mercadonan cu tambe ta
hopi importante pa Aruba, manera Brasil, Argentina y Chile, sigur tin nan retonan economico na
e momentonan aki.
Pues un di e mercadonan, ora cu nos ta pensa den diversificacion di Latino America cu por
brinda nos e diversificacion aki, ta sin duda Colombia na e momentonan aki.
Sin duda nos ta on top of things y nos ta preparando pa e eliminacion y nos ta spera cu en berdad
e lo por redobla kisas te hasta e mercado di Colombia pa Aruba, considerando cu ora nos mira e
cifranan y ora di haci e proyeccionnan tambe, bo tin cu tene na cuenta cu e ta parcialmente
turismo, y e ta parcialmente turismo cu ta surgi di esunnan cu ta bin bishita na famia.
Pues mester tene esey na cuenta tambe pero nos lo keda enfoca riba e mercado desea, cu ta e
mercado di e perfiel di esunnan di entrada mas halto, esunnan cu ta bishitando nos caba y mi ta
kere cu sigur esaki ta un noticia cu a worde bon ricibi den mercado, pues cu e intencion tey pa
elimina e visa,” Ronella Croes, CEO di ATA a declara.