Page 18 - AWEMAINTA1AUG

18 AWEMainta Diasabra, 01 Augustus 2015

Brazil Taekwondo Stichting su
grupo di 8 atleta

A cuminsa cu
training na Pung
Saeng High
School na Korea

DIARAZON ultimo e grupo di 8 atleta di Brazil

Taekwondo Stichting cu a bay bou guia di ex campeon
mundial Henk Meijer a cuminsa cu nan prome training
na Pung Saeng High School na Korea cu ta keda na
Seongnam-Dong.

E prome training a cuminsa pa 8’or di mainta y a bay te
cu 10’or y mey den un sala pata pata di Koreano y algun
atleta di Omman, kendenan tambe a bay pa training
hunto cu e Koreanonan.

E team a wordo presenta n’e atletanan presente p’asina
por a cuminsa cu e training. Pa 20 minut largo tur hende
mester a core den e sala na unda cu cada biaha e tempo
tabata subi.

Despues a sigui cu varios tecnica cu pilon cu a wordo
poni 10 tras di otro haciendo varios ehercicio sea bula
of rondona e pilonnan.
Pa completa e mainta a skop riba e cusinchi grandi te ora
cu e les di mainta caba y a sigui despues cu cooling down.
Na final di training Henk Meijer a wordo yama pa dilanti
p’asina presenta e grupo di 8 atleta di Aruba, kendenan
a biaha pa Korea pa por tin e oportunidad pa train hunto
cu nan.

Despues e grupo di 8 atleta a train atardi for di 2’or y
mey te cu 5’or unda cu bringamento tabata mas central.
E biaha aki tabatin un grupo militar cu tambe a bin train.
Un sala mas grandi ainda na unda cu sigur e grupo
di 8 atleta di Brazil Taekwondo a haya atencion di e
Koreanonan.

Mirando cu Aruba ta un isla asina chikito ta pone cu e
atencion ta grandi cerca e Koreanonan. Henk Meijer,
kende ta ex campeon mundial ta keda un persona
importante aki na Korea.

E team di Train Hard Fight Smart lo tin cu pensa pa
cambia e lema pa Train Harder Fight Smarter den e
dianan aki, pasobra training na Korea no ta nada facil,
e tempo di training cu nan ta train, ta net un paso mas
riba cu esun di Brazil Taekwondo.
Nos tin un caminda pa sigui p’asina nos por garantisa
mas premio den futuro di Brazil Taekwondo Stichting.