Page 45 - MIN.VOS MRT 20,2015

Oral Health Foundation Aruba a wordo lansa

Thursday, 19 March 2015 19:34
Comparti

Diahuebs 19 di maart Oral Health Foundation Aruba a wordo lansa durante un rueda di prensa caminda
cu e fundador y director señorita Dr. Jerrely Franca a hiba palabra pa splica pakiko a lanta e fundacion.
Oral Health Foundation Aruba a wordo funda riba 15 di December 2014 na Aruba. Mientras cu Dr.
Franca tabata terminando su estudionan como dentista na Universidad El Bosque na Bogota, Colombia,
e a haya e oportunidad pa realisa su pasantia na Aruba. E a realisa esaki na diferente institutonan y
departamentonan di salubridad riba nos isla, entre otro na Dr.Horacio Oduber Hospitaal, Departamento
di Salubridad Publico & Wit Gele Kruis, AZV y tambe en conhunto cu Ministerio di Salubridad Publico y
Deporte, Instituto Biba Saludabel y Activo, y Aruba Sport Unie e a forma parti di e Sportcamp 2013.
Durante e periodo aki su persona a discubri y identifica diferente problemanan pa lo cual ta trata salud
oral den nos comunidad, especialmente entre nos muchanan. E a conduci un encuesta nacional, cual a
tuma lugar na maart 2014, na unda e resultadonan a demostra un necesidad urgente pa reforsa y duna
sosten na programanan di salud oral cu ta enfoca riba: prevencion, promocion y educacion di salud oral.
Basa riba su resultadonan y experiencianan duranto su practica, ora Jerrely a termina su estudio como
Dentista a dicidi di bin bek Aruba y funda Oral Health Foundation Aruba.
Den transcurso di aña, Oral Health Foundation Aruba lo ehecuta varios campaña di conscientisacion y
programanan di educacion den diferente scolnan na Aruba. Cu e actividadnan aki e fundacion kier logra
promove cuido oral serca e muchanan di scolnan basico y scolnan avansa na Aruba. Tambe kier logra
educa meastra/o-nan y professionalnan den cuido di mucha pa stimula higiena oral durante oranan di
scol. Ultimamente kier ofrece guia pa lo cual ta trata higiena oral, dieta adecua y ilustra e importancia pa
bishita dentista regularmente.
Durante e rueda di prensa a hiba palabra, entre otro minister di asuntonan social, Drs. Paul Croes, kenda
e splica cu e ta sumamente contento cu e iniciativa di Dr. Franca, pasobra cu e mision di e fundacion
nobo aki lo nifica cu lo combati un parti di negligencia di mucha cu tambe tin si efectonan social menos
bon den nos comunidad.
Dr. Franca a mustra tur presente e website di e fundacion y un animacion cu lo wordo pasa na nos
plantanan nacional tur anochi entre 7'or cu 7'or y mey, pa corda muchanan skeiro nan djente prome cu
bay drumi. Na final Oral Health Foundation Aruba kier a invita henter nos comunidad pa bishita nan
website www.oralhealthfoundationaruba.com y tambe nan pagina riba Facebook.