Page 12 - HOH

Dr. Nuris Lampe den politica

Monday, 10 July 2017 08:37
1

Comparti

Como Arubano y como dokter pa mas di 27 aña mi a dicidi di inicia un labor mas den profundidad di
salubridad pa mi Aruba. Pa hopi tempo mi tabata tin ideanan pa drenta politica, mi a sinti cu awor mi ta
cla pa enfrenta e reto y inicia e lucha aki. Pakico?

Ta asina cu tin masha hopi problemanan na Aruba causa pa mal gobernacion, no solamente awor pero pa
masha hopi aña caba. For di hopi aña pasa mi a premira cu Aruba ta bai ta den un crisis social masha
profundo mes. Un di e causanan ta educacion. Educacion a deteriora poco poco sin cu e gobernantenan
por a mira e daño permanante cu nan a causa na nos generacion di 20 aña pasa. Den cualkier
departamento di gobierno cu mi nombra, educacion ta hunga un rol. Si ta Departamento di Husticia,
educacion. Si ta Departamento di Salud Publico, educacion. Si ta Instituto di Deport, educacion. Si ta
Departamento di Asuntonan Social, educacion.........asina mi por sigui. Ora mi papia di salubridad mi ta
referi na un problema grandi cu a wordo causa door dirigentenan. Y esaki ta nan obra maestra: pa
cuminsa e prome daño cu nan a causa tin di haber cu masha poco educacion den prevencion, tanto e falta
di educacion di nan mes, como di nos pueblo. Ningun gobernante no a inverti tempo ni placa den
prevencion. Paso no ta cumbini nan.

Despues, sin cu e pueblo ta conciente di su malesanan, nan a cuminza ataca e cuidadornan di salud, tanto
specialista como dokter di cas y boticanan etc. Causando un inseguridad y desconfiansa total den nos
dokternan. Siguientemente, nan a cuminsa ataca desde punto di bista financiero, pretendiendo dilanti
husticia cu nan ta para pa interes di nos pueblo, como sifuera cu e dokter no ta pueblo y no ta traha pa
pueblo. Cu esaki nan a logra un efecto boomerang caminda e cantidad di placa cu nan tin di paga pa
tratamento den exterior a crece cada dia mas y mas. Cantidadnan masal di placa ta sali for di Aruba pa
cuido medico pa nos hendenan den exterior. Paso no tin confiansa den dokter local y tampoco nan a
educa e pashent encuanto nan riesgonan di bira malo. Wel ami ta dispuesto pa cuminsa e arduo labor di
cambia e situacion aki y yuda e pashent haya su salud y maneha su salud. Pa enfermedadnan wordo trata
di manera profesional den man di nos dokternan y den caso cu tin mester di intervencionnan di exterior,
no laga e centronan abusa di debilidadnan di nos sistema y cobra cantidad masal di placa pa por yuda un
pashent y pone e mesun exigencianan pa cuido den exterior manera ta pone na Aruba. Poco poco nos lo
incrementa e cuido medico specialisa conforme e desaroyo y avance di ciencia medico.