Page 81 - ROBERT CANDELARIA FLIP 12 AUGUST 2017

2.10.3 Reforsa ARA y CAD

Reforsa ARA y CAD y amplia nan responsabilidad cu e tarea specifico cu den nan trabou
investigativo y di control nan mester enfoca y raporta tambe riba aspectonan di integridad y
bon gobernacion. Importante ta pa e departamentonan aki haya mas autoridad pa loke ta nan
asuntonan di personal y presupuesto.

2.10.4 Depolitisa maneho di personal di gobierno

Lo depolitisa maneho di personal di gobierno pa evita cu gobernantenan ta mal uza esaki pa
metanan politico. Den e cuadro aki lo duna prioridad na tanto e maneho di nombracion como
tambe esun di retiro. Lo traspasa e autoridad pa nombra y retira funcionarionan publico pa
un comision consistiendo di directornan di Directie Financiën (DF), Departamento Recurso
Humano (DRH) y e departamento concerni.

2.10.5 Reforsa proceduranan di destaho publico

Lo introduci un procedura nobo cu na momento cu un minister kier desvia di e reglanan di
contabilidad encuanto destaho publico, e lo mester manda e decreto ministerial pa conseho
cerca DF y CAD cu lo evalua e motibonan pakico e minister kier desvia y duna conseho na e
minister. E decreto ministerial aki mester keda publica hunto cu e consehonan menciona.

2.10.6 Institui Oficina di Integridad

Lo institui un departamento nobo, yama Oficina di Integridad (Bureau Integriteit) cu e tarea
pa formula y implementa un maneho integral pa promove integridad y bon gobernacion.

2.10.7 Cambio di cultura politico

Den e proceso di cambio di cultura politico cu POR ta boga p’e lo incorpora e aspectonan di
integrdad, transparencia y bon gobernacion. Gobierno ta traha cu placa di pueblo y pueblo tin
derecho pa tin un bista cla y completo con gobierno ta maneha su placa y pa tin e siguransa
tambe cu gobierno ta maneha su placa na un forma drechi, serio y responsabel.

51