Page 22 - MIN JUS, APRIL 15,2015

PDR ta cuestiona “pida plastic” cu a wordo traha como rijbewijs!

Publication: Wednesday, 15 April 2015. Categoria: General

ORANJESTAD (AAN) – Como “pida plastic”
mr. Andin Bikker, lider di fraccion di Partido Democracia Real, ta califica e rijbewijs cu nos
ciudadanonan ta hayando na Aruba, y el a cuestiona cu esaki no ta cumpli cu e mesun funcion di
I.D, cu esun prome.
E fraccion ta hayando hopi reclamo, mr. Bikker a subraya, y e ta haya cu cualkier mucha cu por
print bon por traha un rijbewijs asina of hasta mihor.
“Banconan, aparentemente, no ta tume como identificacion oficial, contrario cu e rijbewijs
anterior esun roos, cu si tin tur sorto di sistema di seguridad visible y invisiblemente,
salvaguardia den dje”, mr. Bikker a expresa.
E parlamentario a agrega cu na e momentonan aki, e rijbewijs nobo aki no ta wordo acepta den e
banconan local, y tampoco internacionalmente e ta wordo reconoci; e no tin un traduccion drechi
riba dje, y hasta e Papiamento no tin e ortografia oficial.
Nos ciudadanonan cu ta bay den exterior ta confronta cu e hecho cu e companianan cu ta huur
auto, no ta acepta nan rijbewijs y esaki ta trece cune gastonan inespera, pasobra cada bez nan
mester move den taxi.
Kiermen, e persona ta wordo restringi den su vacacion of den su viahe di trabao.
Esaki ta aspectonan cu PDR ta cuestiona y lo puntra e minister concerni riba esaki y e ta haya cu
nos pais a degrada pa loke ta trata e aspecto aki di rijbewijs.
“ E no ta corecto ni con e minister ta purba bende of defende” mr. Bikker a expresa.
Segun e parlamentario, e minister a keda pushe y PDR tin entendi cu e problema crucial, aunke e
minister no kier admitie, ta cu tin un debe grandi cu e compania cu ta produci e documento aki
na Hulanda, y pa tal motibo a dicidi pa traha nos propio rijbewijs na Aruba.
E parlamentario ta puntra su mes ki mishi un debe, pasobra nan ta cobra pueblo e costonan di
rijbewijs y ta suppose cu e entrada aki mester pase pa e compania cu ta traha e documento aki.