Page 8 - AWEM 20-Apr-2015
P. 8
8 AWEMainta Dialuna, 20 April 2015
Delegacion
di Aruba
ta reuni cu
Greater Miami
Chamber of
Commerce
MIAMI - Greater Miami Chamber of Commerce t’e
prome organisacion pa comerciante di South Florida y
ta awendia e di dos Camara di Comercio mas grandi di
e area region Southeast di Merca. Atlanta t’esun mas
grandi.
E CEO di e organisacion, Barry Johnson a splica durante
di su introduccion n’e mision comercial di Reino
Hulandes lidera pa Prome Minister Mike Eman.
Barry Johnson a splica cu e organisacion ta cubri un area
hopi grandi, pero tur tin nan bista fiha riba un brand, esta
Miami.
Greater Miami Chamber of Commerce tin un programa
di trabao activo cu ta consisti di tres area: Politica
publico, comercio domestico y comercio internacional.
Mayoria di e lidernan di e organisacion, cu ta traha
intensivamente riba relacionnan di negoshi internacional
riba tur continente excepto Australia, ta boluntario.
Greater Miami Chamber of Commerce tin e licencia di
operacion pa Miami Freezone.
Barry Johnson a bisa cu e ta spera cu e bishitantenan
y su organisacion por siña di otro den e encuentro cu e
compania y organisacionnan di Reino Hulandes.
Prome Minister Eman di su parti a expresa e organisacion
pa nan tempo y esfuerso y a introduci e mision
consistiendo di delegadonan di Hulanda, Corsou, St.
Maarten y Aruba.
El a splica cu nan a bin di un conferencia di mundo
maritimo na Panama y cu mayoria di e miembronan di e
delegacion ta activo den e mundo ey.
El a bisa cu ta e Consul General a propone pa conecta cu
partnernan y partnernan potencial na Miami despues di
e conferencia na Panama como cu tin hopi negoshi entre
Miami y miembronan di Reino Hulandes.
Eman a bisa cu mas di 90% di e carga cu ta yega e islanan
ta procedente di e puerto di Miami.
Pa cu barconan crucero tambe ta conta cu un cantidad
hopi grandi ta procedente di of tin base na Miami.
E vinculonan di comercio entre e islanan y Miami ta hopi
fuerte caba y cu e bishita aki e mision comercial kier a
explora con pa intensiva e relacion y oportunidadnan,
Eman a conclui bisando.
